“Plazhin e duam që mos të na vijë dikush nga mali të na vër çadrën aty”. Kështu do shprehej deputetja e Partisë Socialiste, Olta Xhaçka gjatë një interviste për media, si mbrojtje ndaj arsyes përse bashkëshortit i saj, Artan Gaçi është shpallur investitor strategjik në Himarë. E nëse deri para dy ditësh, Xhaçkës i rrezikohej mandati. Dje shumica e deputetëve socialiste (65) abstenuan, ndërsa 9 votuan kundër të enjten në mesnatë, 25 votave pro të opozitës. Çka nuk mjaftoi që mocioni të shkojë drejt Gjykatës Kushtetuese. Kjo është hera e dytë që PS del kundër Gjykatës Kushtetuese, përkundër konstatimeve të gjykatës se këto qëndrime “cënojnë themelet e shtetit” dhe janë “shkelje të rënda të Kushtetutës”.
Ish-ministrja Olta Xhaçka u akuzua nga opozita se ka shkelur Kushtetutën, e cila ndalon qartësisht që një deputet të përfitojë nga të mirat publike, pasi bashkëshorti i saj, biznesmeni Artan Gaçi, fitoi statusin ‘investitor strategjitë dhe iu dha e drejta e përdorimit të bregdetit për 30 vite me vendim qeverie. Por, mazhoranca pasi refuzoi fillimisht me votë të çonte mandatin e deputetes socialiste në Kushtetuese, po zvarrit prej më shumë se një viti zbatimin e vendimit të kësaj gjykate. Në janar të vitit 2023 Kushtetuesja duke i dhënë përgjigje një padie të deputetëve të PD-së rrëzoi si antikushtetues vendimin e Kuvendit për të mos dërguar çështjen pranë kësaj duke kërkuar që të vendosë për të kundërtën. Por, zbatimi i këtij vendimi u zvarrit prej më shumë se një viti me justifikime të ndryshme, ndërkohë që mazhoranca shfrytëzoi krizën e re në Kuvend për shkak të protestave të opozitës, si justifikim për shtyrjen e çështjes pa afat. Pas kalimit në Këshillin e Legjislacionit dhe mandateve pritej votimi dje në seancë që të shkonte ne Gjykatë Kushtetuese. Por si shkak i mos marrjes se votave të mjaftueshme kryetarja e Kuvendit , Elisa Spiropali, tha se do t'a çojnë për Opinion në Komisionin e Venecias. "Për të marrë një mendim të specializuar mbi standardet e zbatueshme në vendimmarrjet e pushtetit legjislativ, raportin dhe konkurrueshmërinë e parimeve të parashikuara në të drejtën kushtetuese dhe për rastet e papajtueshmërisë së mandatit të deputetit"-tha Spiropali. Mbrojtje apo fitim kohe, strategjia e PS tashmë është e qartë nisur nga fakti që zgjedhjet janë një vit larg.
