Trupi ynë është një mozaik i gjallë mikroorganizmash, ku përveç baktereve, jetojnë edhe miliona lloje kërpudhash. Këto ndodhen në lëkurë, në hundë, në traktin tretës, madje edhe në organe të brendshme. Ndërsa shumica e tyre eliminohen shpejt nga sistemi ynë imunitar, disa mbeten bashkëjetues të përhershëm dhe mund të luajnë një rol të rëndësishëm në shëndetin tonë.
Hulumtimet e fundit po shqyrtojnë mundësinë që kërpudhat të ndikojnë jo vetëm në trup, por edhe në tru dhe sjellje. Prej kohësh mjekët e dinë se kërpudhat mund të shkaktojnë infeksione të rënda në tru – shpesh fatale – si ato nga Aspergillus apo Cryptococcus. Por shkencëtarët po analizojnë edhe nëse kërpudhat e zorrëve mund të ndikojnë në shëndetin mendor ose të kontribuojnë në sëmundje neurodegjenerative si Alzheimeri.
Rastet e infeksioneve kërpudhore në tru janë shtuar në dekadat e fundit, kryesisht për shkak të numrit në rritje të pacientëve me sistem imunitar të dobësuar – nga HIV, trajtime për kancer apo përdorimi i ilaçeve imunosupresive. Infeksionet janë të vështira për t’u trajtuar, pasi ilaçet antifungale janë të pakta dhe shpesh nuk depërtojnë në barrierën gjak-tru.
Megjithatë, disa studime kanë dhënë prova intriguese. Në disa pacientë të diagnostikuar fillimisht me Alzheimer, mjekët zbuluan prani kërpudhash në tru dhe pas trajtimit me ilaçe antifungale, simptomat e demencës u lehtësuan ndjeshëm – disa madje rifilluan punën.
Shkencëtarët theksojnë se ky është një fushë e re studimi dhe se ka ende më shumë pyetje sesa përgjigje. Por nëse vërtetohet, lidhja mes kërpudhave dhe trurit mund të hapë rrugë të reja për parandalimin dhe trajtimin e sëmundjeve neurologjike.
???? Një gjë është e sigurt: kërpudhat janë një pjesë e pandashme e trupit të njeriut dhe ndikimi i tyre në shëndetin tonë mund të jetë shumë më i madh se sa kemi menduar deri tani.
