Një hap i rëndësishëm shkencor është bërë nga studiuesit e Institutit të Teknologjisë në Masaçusets (MIT), të cilët kanë krijuar dy antibiotikë të rinj me ndihmën e inteligjencës artificiale (IA), të aftë të luftojnë bakteret e rezistueshme ndaj ilaçeve, duke përfshirë gonorrenë dhe stafilokokun.
Sipas studiuesve, këta ilaçe janë projektuar atom pas atomi nga algoritmet e inteligjencës artificiale dhe kanë treguar rezultate premtuese në testet laboratorike dhe në kafshë të infektuara. Kjo arritje shënon një moment potencialisht të rëndësishëm në luftën kundër infeksioneve që tashmë kanë zhvilluar rezistencë ndaj antibiotikëve të zakonshëm.
Si funksionojnë antibiotikët e rinj
Procesi i zhvillimit përfshiu trajnimin e inteligjencës artificiale me strukturat kimike të komponimeve të njohura dhe të dhënat mbi efektivitetin e tyre ndaj baktereve të ndryshme. IA mësoi të analizojë se si strukturat molekulare, të ndërtuara nga atome si karboni, oksigjeni, hidrogjeni dhe azoti, ndikojnë në vrasjen e bakterëve. Pas zhvillimit të komponimeve të reja, studiuesit testuan modelet kryesore në laborator dhe në minj të infektuar, duke identifikuar dy antibiotikë me potencial të lartë. Megjithatë, shkencëtarët theksojnë se këto ilaçe nuk janë ende gati për përdorim klinik dhe do të kërkojnë rafinim dhe teste të mëtejshme, që pritet të zgjasin një deri dy vjet përpara se të fillojë faza e testimeve te njerëzit.
Nevoja për antibiotikë të rinj
Infeksionet rezistente ndaj antibiotikëve janë një problem i madh shëndetësor global, duke shkaktuar më shumë se një milion vdekje në vit. Përdorimi i tepërt i antibiotikëve të njohur ka nxitur evolucionin e baktereve, duke i bërë ata më të aftë për t’u shmangur efektet e ilaçeve ekzistuese. Për dekada të tëra ka pasur një mungesë të antibiotikëve të rinj, duke e bërë gjetjen e trajtimeve inovative një prioritet global.
Hulumtuesit e MIT kanë përdorur më parë inteligjencën artificiale për të shqyrtuar mijëra kimikate të njohura, me qëllim identifikimin e atyre që mund të shndërrohen në antibiotikë të rinj. Kjo metodë inovative mund të shënojë fillimin e një epoke të re të zhvillimit të barnave, duke e quajtur nga ekspertët si një “epokë e dytë e artë” e zbulimit të antibiotikëve.
Shkencëtarët paralajmërojnë se, edhe pse rezultatet laboratorike janë premtuese, rruga drejt aprovimit për përdorim te njerëzit mbetet e gjatë dhe do të kërkojë shumë testime klinike dhe verifikime të sigurisë.
Ky zhvillim i ri tregon potencialin e jashtëzakonshëm të inteligjencës artificiale në mjekësi dhe farmacologji, duke ofruar shpresë për luftën kundër infeksioneve rezistente dhe për krijimin e barnave të reja që mund të shpëtojnë jetë.
