Fibromialgjia është një nga ato sëmundje të padukshme që shkatërrojnë njeriun nga brenda, ndërsa nga jashtë duket sikur gjithçka është në rregull. Dhimbje të vazhdueshme në muskuj dhe nyje, lodhje ekstreme, pagjumësi dhe ndjenja ankthi – janë disa nga simptomat që e bëjnë këtë gjendje një barrë të rëndë, sidomos për gratë.
Por çfarë është në të vërtetë fibromialgjia? Specialistët gjithnjë e më shumë po e lidhin këtë sindromë me emocionet e pashprehura dhe konfliktet e brendshme. Sipas mjekësisë tradicionale kineze, organi që ndikohet më shumë është mëlçia – depoja e emocioneve të shtypura. Dhe kur kjo energji nuk çlirohet, ajo manifestohet përmes dhimbjes.
“Nuk ka ndarje mes mendjes dhe trupit – mendimet, ndjenjat dhe shëndeti fizik janë të lidhur ngushtë. Fibromialgjia është një pasojë e kësaj ndarjeje të pavetëdijshme që ne bëjmë çdo ditë”, thuhet nga ekspertët.
Simptomat përfshijnë:
– Dhimbje të përgjithshme trupore
– Lodhje e vazhdueshme
– Pagjumësi
– Probleme me kujtesën dhe përqendrimin
– Dhimbje koke, ankth, menstruacione të dhimbshme, ndjesi tensionesh në trup
Pse preken më shumë gratë?
Fibromialgjia prek më shpesh gratë se burrat. Sipas specialistëve, kjo lidhet me natyrën më emocionale të grave dhe faktin se ato shpesh janë më të shtypura emocionalisht që në fëmijëri. Kultura, familja, shoqëria – të gjitha ndikojnë në modelimin e një sjelljeje ku ndjenjat nuk shprehen, por shtypen.
A është e shërueshme fibromialgjia?
Megjithëse konsiderohet sëmundje kronike, ekspertët theksojnë se përmirësimi është i mundur – madje i prekshëm – nëse individi është i gatshëm të ndryshojë mënyrën e të menduarit, të ndjerit dhe të vepruarit. Ndryshimi i stilit të jetesës, menaxhimi i stresit, ushqyerja e shëndetshme dhe trajtimet integrative janë hapa kyç drejt përmirësimit.
Në ndihmë mund të vijë edhe stimulimi transkranik, një teknikë që ndikon në aktivitetin elektrik të trurit dhe rrit prodhimin e neurotransmetuesve si serotonina dhe melatonina, që ndihmojnë në rregullimin e gjumit dhe humorit.
Fibromialgjia – sëmundje moderne?
Jo domosdoshmërisht. Ajo ka ekzistuar gjithmonë, por sot është më e përhapur për shkak të stilit të jetesës së ngarkuar, presionit për të qenë të përkryer në çdo aspekt – në punë, familje dhe shoqëri. Shpesh, gratë ndihen të rraskapitura nga barra e shumë roleve që mbajnë mbi supe.
