Kuvendi i Shqipërisë mblidhet këtë të hënë, më 27 korrik, në seancë plenare publike, e cila do të nisë në orën 10:00.
Sipas rendit të ditës, deputetët do të miratojnë fillimisht procesverbalin e seancës së kaluar dhe do të shqyrtojnë njoftimet, ndërsa pika kryesore është projektvendimi për ndryshimin e vendimit nr. 87/2026, që lidhet me caktimin e anëtarëve zëvendësues në përbërjen e komisioneve të përhershme të Kuvendit.
Ndërkohë, paralelisht me zhvillimin e seancës, para godinës së Parlamentit është paralajmëruar një protestë. Organizatorët u kanë bërë thirrje qytetarëve të mblidhen që në orën 08:00, duke e cilësuar tubimin si një reagim ndaj Kuvendit dhe klasës politike, të cilat, sipas tyre, janë shkëputur nga shqetësimet dhe interesat e qytetarëve.
Për shkak të protestës, autoritetet kanë parashikuar masa të shtuara sigurie dhe një prani të përforcuar të forcave të policisë në zonën përreth Kuvendit.
