Gjykata Kushtetuese rrëzoi për të dytën herë kërkesën e gjyqtares Marsida Xhaferllari për heqjen dorë nga shqyrtimi i çështjes ndaj ish-kryeministrit Sali Berisha. “Mbledhja e gjyqtarëve, bazuar në përmbajtjen e kërkesës së gjyqtares Marsida Xhaferllari, si edhe referuar të dhënave të parashtruara në kërkesën për përjashtim që janë bërë premisë për kërkesën e saj për heqje dorë nga shqyrtimi i çështjes, vlerëson se kërkesa nuk është e bazuar në këndvështrim të të dy testeve të paanshmërisë. Për sa i përket testit subjektiv, nuk ka ndonjë të dhënë konkrete në drejtim të bindjes së brendshme të gjyqtares ndaj paanshmëria e saj mbetet e prezumuar, për sa kohë nuk provohet e kundërta. Ndërsa sa i përket testit objektiv, nuk rezulton e provuar ndonjë sjellje konkrete individuale e gjyqtares dhe as ndonjë fakt bindës apo arsye të përligjur që vë në dyshim paanshmërinë e saj në gjykimin e çështjes, pra se ajo nuk ofron garanci të mjaftueshme për të përjashtuar çdo dyshim të arsyeshëm që do të cenonte paanësinë në gjykimin e çështjes,” thuhet në vendimin e GJK që disponon VNA. Mësohet se pas këtij vendimi, sërish ish-kryeministri Berisha ka bërë kërkesë të re përmes avokatëve për përjashtimin e Xhaferllarit. Më 17 janar Gjykata Kushtetuese do të shqyrtojë kërkesën e ish-kryeministrit për shfuqizimin e masës së arrestit në shtëpi ku Berisha qëndroi për 11 muaj me radhë.
