Gjatë seancës gjyqësore në procesin e njohur si “Plumbi i Artë”, bashkëpunëtori i drejtësisë Nuredin Dumani ka bërë një dëshmi të bujshme, duke pretenduar se ka paguar 40 mijë euro për të siguruar lirimin nga burgu.
Sipas deklaratës së tij, shuma prej 40 mijë eurosh është dhënë në dorë dhëndrit të vëllait të ish-deputetit Nasip Naço. Në atë kohë, ky person mbante postin e shefit të një spitali dhe, sipas Dumanit, ka ndihmuar në sigurimin e një dokumenti që justifikonte lirimin nga qelia për arsye shëndetësore.
Këto pretendime kanë sjellë reagimin e menjëhershëm të ish-ministrit të Drejtësisë, Nasip Naço. Në një postim në rrjetet sociale, Naço ka mohuar kategorikisht çdo lidhje me këto akuza dhe ka kërkuar që organet përkatëse të drejtësisë të hetojnë tërësisht çështjen.
“Distancohem nga çdo akuzë e bërë dhe ftoj autoritetet që të ndërmarrin të gjitha masat ligjore për të hetuar këtë rast deri në fund. Çdo person i përfshirë duhet të përballet me drejtësinë, nëse këto akuza rezultojnë të vërteta,” ka shkruar Naço.
Reagimi i ish-ministrit të Drejtësisë Nasip Naço:
Jam njohur sot nga mediat ku përmendet emri im. Dua të theksoj se:
Distancohem nga çdo akuzë e bërë publike sot dhe ftoj organet e drejtësisë që të kryejnë një hetim të thelluar mbi këtë rast. Nëse akuzat vërtetohen, organet përkatëse duhet të marrin masa ligjore ndaj çdo personi të përfshirë në këtë çështje. Roli i Ministrit të Drejtësisë, sipas legjislacionit në fuqi, është i kufizuar. Ministri:
– Nuk heton,
– Nuk ngre akuza,
– Nuk pushon çështje,
– Nuk jep vendime fajësie apo pafajësie.
Detyra e tij lidhet vetëm me dhënien e lejeve të veçanta për të dënuarit, bazuar në ligj.
Gjatë ushtrimit të detyrës sime si Ministër i Drejtësisë, nuk kam miratuar asnjë leje të veçantë për subjektin në fjalë. Distancohem nga çdo mashtrim, i bërë nga kushdo, individualisht apo në bashkëpunim, për të dëmtuar integritetin tim. Akuzat publike të bëra sot nuk përputhen me faktet reale të ushtrimit të detyrës sime si Ministër.
Faleminderit!
