Portali Ditar ka publikuar sot një sondazh për zgjedhjet e reja, duke u fokusuar kryesisht te partitë e reja. Si një media afër deputetit Agron Shehajt, ishte e pritshme që rezultati i pyetjeve të 1200 qytetarëve të ishte ai që i vjen për shtat zotit Shehaj.
Por deri diku duhet të ishte treguar kujdes sepse në një nga pikat e sondazhit Agron Shehaj del më i besuar edhe se kryeministri Rama. Jo se Edi Rama është ndonjë personazh të cilit shqiptarët i besojnë, por çështja e besimit dhe e votave nuk janë aq të larg njëra-tjetrës.
Sipas të dhënave të publikuara nga portali Ditar, Agron Shehaj, lider i Partisë Mundësia, kryeson me 40.4% të besimit të qytetarëve. Pas tij renditet kryeministri Edi Rama, me 34.7%, dhe Adriatik Lapaj i “Shqipëria Bëhet” me 34.6%. Në vendin e katërt është Arlind Qori i “Lëvizja Bashkë” me 23.8%, ndërsa lideri historik Sali Berisha zë vendin e pestë me 17.6%.
Në pozicionet më të ulëta ndodhen Endri Shabani me 13.1% dhe Ilir Meta, i cili ka marrë vetëm 3.3% të besimit të qytetarëve.
Rezultatet e sondazhit duken interesante për ata që e kanë porositur, por sesa pranë të vërtetës është, mbetet për t’u parë.
