Kryeministri Edi Rama, nga Abu Dabi, njoftoi nënshkrimin e një marrëveshjeje trilaterale mes Shqipërisë, Italisë dhe Emirateve të Bashkuara Arabe për krijimin e një lidhjeje energjetike nënujore mes Shqipërisë dhe Italisë. Marrëveshja pritet të jetë një hap i rëndësishëm drejt pavarësisë energjetike dhe pozicionimit të Shqipërisë si eksportues energjie në Bashkimin Europian.
“Lidhja energjetike do të ketë një pronësi të trefishtë dhe do të mbështetet nga investime të mëdha për rritjen e kapaciteteve prodhuese në Shqipëri. Ky projekt është një gur kilometrik në rrugën tonë për t’u bërë të pavarur nga importi i energjisë dhe për të luajtur një rol të rëndësishëm në tregun energjetik europian,” deklaroi Rama.
Gjithashtu, kryeministri theksoi rëndësinë e energjisë diellore, duke shprehur synimin që deri në përfundim të mandatit të katërt, 30% e energjisë së prodhuar në Shqipëri të jetë nga burimet diellore.
Marrëveshja, e firmosur me pjesëmarrjen e kryeministres italiane Giorgia Meloni dhe presidentit të Emirateve të Bashkuara Arabe, Mohammed bin Zayed, synon të forcojë bashkëpunimin rajonal dhe të rrisë kapacitetet energjetike të vendit.
