Me pretekstin e mungesës së një vendimi të ndërmjetëm, Konferenca e Kryetarëve nuk ka zgjatur afatet e Komisionit Hetimor për sterilizimin dhe check-up në shëndetësi.
Pavarësisht se deputetët e opozitës kërkuan zgjatjen e afatit, duke argumentuar se ende nuk ishin dëgjuar të gjithë dëshmitarët e rëndësishëm për koncesionet, shumica e PS-së preferoi të mbyllte gjithçka.
Shenjat që ky komision po shkonte drejt fundit, u panë që ditën e djeshme kur për shkak të mos dakordësisë sollën nga burgu deri tek Kuvendi ish-ministrin e Shëndetësisë Ilir Beqajn dhe nuk dëgjuan dëshminë e tij.
Zgjatja e mandatit të këtij komisioni duket se u shërbeu palëve për të vazhduar me retorikën politike, pa arritur asnjë përfundim të qenësishëm. Dëshmitë e ofruara gjatë seancave të fundit kanë hedhur pak ose aspak dritë mbi korrupsionin në koncesionet e sterilizimit dhe të check-up-it.
Askush nuk arrin të kuptojë pse duhet spektakël që një ish-ministër dhe një ish-zëvendësministër, me pranga në duar, të vijë të dëshmojë për një çështje që po hetohet nga Prokuroria e Posaçme dhe është në gjykim. Po aq të pakuptimta janë edhe dëshmitë e mjekëve, të cilët, të papërgatitur për shfaqje politike, nuk janë në vendin e duhur për të treguar të vërtetën përpara deputetëve që konfliktohen me njëri-tjetrin.
Me gjasë ajo që do të mbetet në mendjen e publikut sesa punimet e komisionit janë sherret e zhurmshme mes Albana Vokshit dhe Plarent Ndrecës, të cilët, mes debateve pa ndonjë vlerë, kanë arritur vetëm të shtyjnë punimet e komisionit për një kohë të gjatë.
Megjithatë, nëse ky Komision do të kishte seriozitetin e duhur, palët nuk do të kursenin të merrnin në pyetje as Vilma Nushin dhe Klodian Allajbeun, dy përfituesit e drejtëpërdrejtë të koncensioneve. Thirrja e përsëritur e kryetares së këtij komisioni, Albana Vokshi, për të patur si dëshmitare edhe Vilma Nushin, përfituese të koncesionit të check-up-it, është refuzuar nga deputetët e PS.
Nga ana tjetër, edhe opozita nuk duket krejt e sinqertë në përpjekjet e saj për transparencë. Që në nisje të punës së këtij komisioni, ajo amnistoi dy nga koncesionet më të kushtueshme në shëndetësi: atë të dializës dhe pajisjeve laboratorike. Të dyja këto koncesione janë marrë në emrin e Klodian Allajbeut të Spitalit Amerikan.
Në fund arrijmë te mesazhi më i sinqert që na servir e gjithë 'shfaqja' e këtij komisioni hetimor: “shumë fjalë për asgjë”. Ose një qëllim e arriti, shërbeu si pretekst i opozitës për të shuar trazirat e para disa muajve në Parlament.
