Klodian Zoto, një prej dy pronarëve de facto të inceneratorit të Tiranës, ka punuar si këshilltar ligjor i Salarjon Totës, bashkëshortit të Ministres së Shtetit për Marrëdhëniet me Parlamentin, Elisa Spiropalit kur ai ushtronte detyrën e drejtorit të Ujësjellës Kanalizime në Fier.
“Klodian Zoto ka patur marrëdhënie kontraktuale pune pranë shoqërisë aksioneve Ujësjellës Kanalizime me detyrë këshilltar ligjor i drejtorit të Përgjithshëm Salarjan Tota me kohe të pjesshme nga data 14.01.2013-1.08.2014 emëruar sipas urdhrit të këtij të fundit me nr.44/4 prot datë 14 janar 2023”, thuhet në dosjen e SPAK.
Klodian Zoto ndodhet në arrati për korrupsion e pastrim parash bashkë me “trurin” tjetër të inceneratorëve Mirel Mërtiri. Zoto dhe Mërtiri kanë patur disa kontrata për vendosjen e matësave të ujit në Bashki të ndryshme të vendit, përfshirë dhe atë të Fierit, kur drejtohej nga Bafjtar Zeqaj, aktualisht deputet i partisë Socialiste.
Ndërmjetës për takimet mes kryebashkiakëve socialistë dhe dy pronarëve de facto të inceneratorit të Tiranës, Mërtiri e Zoto ishte ish-zëvendëskryeministri Arben Ahmetaj. Kjo duket qartë nga mesazhet që ka shkëmbyer me këta të fundit përfshirë dhe Zeqajn.
I pyetur në SPAK, Baftjar Zeqaj ka rrëfyer njohjen dhe marrëdhëniet me Arben Ahmetaj. “Prej vitit 2003 deri në 2015 kam qenë kryetar i Bashkisë Fier. Për një periudhë 6 mujore kam qenë drejtori i kompanisë së naftës “Albpetrol” dhe kam dhënë dorëheqjen përpara se të bëhesha deputet. Arben Ahmetajn e njoh prej vitesh si anëtar të Partisë Socialiste dhe rolin që ka patur. Me Arbenin nuk kam patur marrëdhënie shoqërore, por marrëdhënia jonë ishte zyrtare për shkak të interesave të punës dhe të partisë që përfaqësonim”, thotë ai.
Baftjar Zeqaj mohon të ketë patur takime me Mirel Mërtirin dhe Klodian Zoton. Ndërsa flet me shqetësim për mënyrën sesi bashkëshorti i Spiropalit u emërua e drejtoi Drejtorinë e Ujësjellës Kanalizimeve.
“Salarjon Totën e njoh herët pasi është djali i shokut tim L.Tota. Më pas e njoh si drejtor të ujësjellës kanalizime Fier. Zgjedhja e tij si drejtor i UKF është bërë nga bordi i ujësjellësit dhe dua të sqaroj se Ujësjellësi nuk ka qenë institucion në varësi të Bashkisë Fier, ku unë mbaja pozicionin e kryetarit. Dua të sqaroj se në kohën kur Salarjoni u bë drejtor unë kam qenë kundër këtij vendimi. Në momentin që u zgjodh si drejtues i UKF nuk kam patur marrëdhënie me të. Bordi i Ujësjellësit zgjidhet nga Këshilli I Bashkisë Fier”, shpjegon Zeqaj.
AI flet në dëshmi edhe për marrjen e një kredie në një kohë që për rrjetin e ujësjellës kanalizimeve ishte marrë dhe po shlyhej një kredi në bankën Gjermane.
“Kam qenë shumë i tronditur në periudhën 2012-2013 kur mësova që Bordi I Ujësjellës Kanalizimeve Fier do të merrte kredi për sahatet. Për dy arsye, së pari ne si Bashki kishim një marrëdhënie shumë të mirë me Bankën Gjermane KFV, pasi investimi I saj kishte nisur dhe ishte në formë kredi, po kështu ishte në fazën përmbyllëse të Ujësjellës kanalizime Fier. Ne atë kohë, nga Bashkia ne bashkëpunim me KFV po punohej për rrjetin e brendshëm të ujësjellësit të qytetit. Edhe banka gjermane u shqetësua se po merrej kredi tjetër dhe ndërkohë që ishte duke u shlyer kredia e tyre. Bordi mori vendim për kredinë e re për 5 milionë euro. Momenti i dytë që u shqetësova ishte se nuk kishte përfunduar rrjeti i ri dhe nuk kishte pse të nevojiteshin sahatet në këtë moment. Se dhe Bordi këtë kredi e ka marrë me emergjencë dhe është marrë sapo është ndërtuar Bordi me drejtorin e ri, Salarjonin. Po kështu unë kam dhënë dy konferenca shtypi ku kam argumentuar se është një kredi e pajustifikuar dhe monente gjithë investimin e bankës gjermane. Nuk e di nëse kanë qenë Klodian Zoto dhe Mirel Mërtiri personat që kanë marrëv kredinë dhe kanë sjellë sahatët…”, përfundon Zeqaj.
Pavarësisht kësaj dëshmie dhënë para prokurorëve është detyrë e SPAK të sqarojë marrëdhënien e bashkëshortit të ministres Spiropali me bosët e inceneratorëve. Nuk duket aspak e rastësishme që e gjithë kupola e socialistëve dhe e familjarëve të tyre është e përfshirë direkt apo tangent me pazaret që Klodian Zoto dhe Mirel Mërtiri kanë bërë me milionat e inceneratorëve të paguara nga xhepat e shqiptarëve.
