Zbardhet dëshmia e ish-ministrit Damian Gjiknuri në SPAK në kuadër të hetimeve ndaj ish-zv.kryeministrit Arben Ahmetaj që ndodhet tashmë në arrati.
SPAK e pyeti Gjiknurin, pasi rezultonte të kishte udhëtuar më bossët e inceneratorëve, Mirel Mërtiri dhe Klodian Zoto dhe ngriheshin dyshime se këto udhëtime ishin financuar nga dy biznesmenët tashmë në arrati për korrupsion e pastrim parash.
Në dëshminë e dhënë para hetuesve, Gjiknuri ka pranuar se ka njohje me Mirel Mërtirin, por nuk e kujton nëse ia ka prezantuar Arben Ahmetaj apo Klodian Zoto dhe se e ka takuar atë 2 ose 3 herë, njëri nga rastet në Vjenë, por ka mohuar që ai ti ketë financuar udhëtimet.
“Kemi qenë në një delegacion për negociatat e CEZ, ishin në Arbitrazh, për zgjidhje me pajtim, negociatat zhvilloheshin në mënyrë periodike në Vjenë, gjatë periudhës dhjetor 2013 deri në maj-qershor 2014.
Në delegacion përgjithësisht kemi qenë Ministri i Energjisë, Ministri I Ekonomisë Ahmetaj zv.ministri I Financave Erjon Luci, Entela Cipa që ishte këshilltarja ime dhe avokatja Alma Hicka. Unë në Vjenë kam qëndruar në hotel Ambasador, një natë bashkë me pjesëtarë të tjerë të delegacionit, kurse Arben Ahmetaj qëndroi në një hotel tjetër që nuk ishte larg nga hoteli ku rrinim në të tjerët. Arben Ahmetaj më ka thënë nëse doja dhe unë të shkoja te hoteli ku qëndronte ai, konkertisht të hotel Radisson, pasi ishte më një shok. Unë nuk pranova pasi ndërkohë e kisha dhomën të prenotuar tek hoteli që thashë më lart. Në darkë jemi takuar, kemi dalë dhe kemi pirë ndonjë gotë. Kemi qenë unë, Arben Ahmetaj dhe Mirel Mërtiri dhe një I huaj, që unë nuk e di cfarë ishte, kroat, slloven a serb. Mireli dhe ky shtetasi i huaj ishin në shoqërinë e Arben Ahmetaj. Bisedat që janë bërë atë mbrëmje në tavolinë kanë qenë muhabete të përgjithshme, nuk më ka mbetur në mendje ndonjë gjë e vecantë. Më vonë kam mësuar nga të dhënat që janë bërë publike se qenka bërë booking në emrin tim nga Klodian Zoto në hotel Radisson Blue, por ju sqaroj dhe njëherë se Klodian Zoto nuk ka folur me mua ndonjëherë për këtë udhëtim dhe besoj se do ta ketë marrë vesh nga Arben Ahmetaj, i cili ka thënë që të më rezervonte një dhomë dhe mua.
Në këto data për të cilat po pyetem, mesa mbaj mend, Arbeni ka fjetur te Radisson, madje më ka thënë që kishte bërë gati një dhomë edhe për mua, ndërsa unë kam fjetur në një hotel tjetër me delegacionin, hotel Ambasador. Për këtë gjë Ministria disponon edhe dokumentacionin përkatës.
…edhe nëse është bërë për tek hotel Radisson (nga llogaria Bankare e shtetasit Damian Gjiknuri) i bie që unë kam paguar shpenzimet e mia”, thotë ish-ministri në dëshmi.
Gjiknuri ka dhënë shpjegime edhe për një udhëtim të dytë, që dyshohet të ketë qenë në shoqërinë e bossëve të inceneratorëve, Mirel Mërtiri dhe Klodian Zoto, si dhe ish-zv.kryeministrin Arben Ahmetaj.
“Dua të shpjegoj edhe udhëtimin që kam bërë me Arben Ahmetaj dhe Etien Xhafa në shkurt të 2014, ku fillimisht kemi ndaluar në Romë për të zhvilluar takime në një ministri, takim zyrtar. Në darkë, në datën 8 shkurt 2014 kemi mbërritur në Frankfurt për tu akomoduar një natë e më pas të fluturonim për në Amerikë. Të tre kemi fjetur në hotel Marriot. Hoteli ka qenë I paguar për një natë. Madje kujtoj se atë natë kam qenë sëmurë dhe nuk kam dalë fare nga dhoma. Të nesërmen në mëngjes kemi udhëtuar në drejtim të Amerikës. Duke qenë se ky rast është bërë publik në media, unë jam interesuar pranë Ministrisë për të administruar praktikën e udhëtimit. Në praktikën që gjeta, citohej se të gjitha shpenzimet mbuloheshin nga ministria e Ekonomisë, ku ministër ishte Ahmetaj. Pra ditën që unë kam fjetur në këtë hotel, nuk kam patur informacion se nga kush është bërë pagesa. Ka qenë dhe kolegu im Ahmetaj, I cili në dijeni time kishte miqësi me Klodian Zoton e Klodian (Mirel) Mërtirin. Dua të sqaroj se unë nuk kam organizuar asnjëherë udhëtim me Mirel Mërtirin dhe Klodian Zoton, por mund të ketë ndodhur që kemi udhëtuar në të njëjtën linjë, por nuk ka qenë e planifikuar dhe nuk ka patur lidhje udhëtimi I tyre me mua“, përfundon Gjiknuri.
