Televizioni shtetëror iranian ka bërë të ditur se Teherani ka siguruar një draft fillestar jozyrtar për një memorandum mirëkuptimi me Shtetet e Bashkuara, që synon t’i japë fund konfliktit mes dy vendeve, raportoi agjencia Reuters.
Sipas kornizës së propozuar, Irani do të rikthente transportin tregtar detar në Ngushticën e Hormuzit në nivelet e para luftës brenda një muaji. Nga ana tjetër, SHBA do të tërhiqte forcat ushtarake nga zonat pranë Iranit dhe do të hiqte bllokadën detare.
Mediat shtetërore iraniane theksuan se drafti nuk është finalizuar ende dhe se Teherani nuk do të ndërmarrë hapa konkretë pa një “verifikim të prekshëm” të marrëveshjes. Dokumenti parashikon gjithashtu që Irani të menaxhojë trafikun detar në Ngushticën e Hormuzit në bashkëpunim me Omanin, ndërsa anijet ushtarake përjashtohen nga marrëveshja.
Sipas raportimeve, nëse një marrëveshje përfundimtare arrihet brenda 60 ditëve, ajo mund të miratohet si rezolutë detyruese nga Këshilli i Sigurimit i OKB-së.
Memorandumi i mundshëm mes SHBA-së dhe Iranit vjen pas bisedimeve indirekte të nisura pas konfliktit që shpërtheu në muajin shkurt, ku Pakistani ka luajtur rol kyç si ndërmjetës mes Teheranit dhe Uashingtonit.
Përshkallëzimi i tensioneve nisi pas përplasjeve të forta mes Iranit dhe Izraelit në fillim të vitit, me sulme të ndërsjella me raketa dhe dronë që tronditën transportin detar në Gjirin Persik dhe rritën frikën për një konflikt më të gjerë në rajon.
