Libani është goditur nga një valë e re dhe intensive sulmesh ajrore dhe artilerie nga Izraeli, të përqendruara kryesisht në jug dhe në lindje të vendit, në kuadër të operacioneve kundër Hezbollah.
Ushtria izraelite deklaroi se ka shënjestruar mbi 100 objektiva infrastrukturore dhe luftëtarë të Hezbollahut gjatë një prej bombardimeve më të rënda që nga nisja e armëpushimit të ndërmjetësuar nga SHBA në mesin e prillit.
Autoritetet shëndetësore libaneze raportuan se vetëm në fshatin Mashghara në Luginën Bekaa janë vrarë 11 persona, përfshirë dy fëmijë. Nga ana tjetër, ushtria izraelite tha se sulmet kishin në shënjestër vende ku ishte identifikuar “aktivitet terrorist”.
Përshkallëzimi vjen pas deklaratave të kryeministrit izraelit Benjamin Netanyahu, i cili tha se ka urdhëruar intensifikimin e sulmeve ndaj Hezbollahut, duke paralajmëruar “goditje shkatërruese”.
Situata ka rritur panikun në periferi të Bejrutit, ku mijëra banorë janë larguar nga shtëpitë e tyre. Sipas Ministrisë së Shëndetësisë së Libanit, numri total i viktimave nga sulmet izraelite gjatë kësaj periudhe ka arritur në të paktën 3,185 persona.
