Kryeministrja italiane Giorgia Meloni ka hedhur kritika të forta ndaj mënyrës se si funksionon sot Bashkimi Europian, duke e përshkruar atë si një strukturë të mbingarkuar me burokraci që, sipas saj, po pengon konkurrueshmërinë dhe zhvillimin strategjik të Europës.
Gjatë fjalimit të mbajtur në asamblenë e përgjithshme të Confindustria, Meloni u shpreh se institucionet europiane kanë shtuar vazhdimisht rregulla dhe procedura në çdo aspekt të jetës ekonomike dhe sociale.
Sipas saj, Europa ka treguar mungesë vizioni në momentet kur duhej të kishte një rol më të fortë në skenën ndërkombëtare. Ajo kritikoi gjithashtu qasjen që e cilësoi ideologjike dhe teknokratike të institucioneve europiane, duke thënë se shpesh janë lënë në plan të dytë nevojat reale të ekonomisë dhe zhvillimit.
Kryeministrja italiane nënvizoi se politika duhet të rikthejë rolin kryesor në vendimmarrjen europiane, ndërsa burokracia, sipas saj, duhet vetëm të zbatojë orientimet politike dhe jo të marrë vendin e tyre.
