Deri pak muaj më parë, Ozgur Ozel dukej si një figurë kalimtare në krye të CHP-së, partisë historike të themeluar nga Mustafa Qemal Ataturku. Një politikan korrekt, burokratik dhe pa shumë karizëm, i destinuar të jetonte në hijen e Ekrem Imamoglut, kryebashkiakut të Stambollit dhe rivalit më të fortë të Recep Tayyip Erdogan.
Por arrestimi i Imamoglut dhe ofensiva e drejtësisë turke kundër opozitës duket se po prodhojnë efektin e kundërt nga ai që priste pushteti.
Ozel po shfaqet gjithnjë e më shumë si fytyra e re e rezistencës kundër Erdoganit.
Dje tensioni arriti kulmin kur policia turke hyri me forcë në selinë qendrore të CHP-së në Stamboll dhe shpërndau protestuesit me gaz lotsjellës, shkopinj gome dhe dhunë fizike.
Shkaku ishte një vendim shumë i debatueshëm i Gjykatës së Apelit, e cila anuloi kongresin e vitit 2023 — kongresin që solli në krye Ozgur Ozelin — dhe riktheu si lider ish-kryetarin Kemal Kilicdaroglu, politikani që humbi përballë Erdoganit dhe që më pas u la në hije nga vetë partia.
Zyrtarisht, Erdogani nuk ka lidhje me vendimin. Por për opozitën turke bëhet fjalë për një operacion politik të menaxhuar nga gjyqtarë dhe prokurorë pranë AKP-së.
Dhe pikërisht aty nisi transformimi politik i Ozelit.
Ndërsa policia shpërndante militantët, ai nuk u tërhoq. Përkundrazi, marshoi për kilometra drejt Parlamentit nën shi, i lagur plotësisht, por duke refuzuar të largohej nga rruga. Pamjet e tij të mbuluar nga shiu janë kthyer tashmë në simbol për militantët e CHP-së.
“Që sot partia zhvendoset në sheshe”, deklaroi ai para turmës, ndërsa akuzoi drejtpërdrejt Erdoganin se po përpiqet të zgjedhë vetë rivalët e tij politikë për zgjedhjet e ardhshme.
Ironia më e madhe është se në këtë krizë rol kyç po luan vetë Kilicdaroglu, ish-lideri që kërkon të rikthehet në krye të partisë me ndihmën e vendimeve gjyqësore dhe ndërhyrjes së policisë.
Kjo i ka dhënë Erdoganit mundësinë ta paraqesë krizën si një konflikt të brendshëm opozitar. Por analistët turq thonë se realiteti është krejt tjetër.
Sipas profesorit Murat Somer, rreth 95% e votuesve të CHP-së mbështesin drejtimin aktual të Ozelit, ndërsa shumica e opinionit publik e konsideron ofensivën ndaj partisë si politike.
Ndërkohë, Imamoglu vazhdon të mbetet në burg me akuza për korrupsion, në një proces që opozita e konsideron të orkestruar për ta nxjerrë jashtë garës presidenciale të vitit 2028.
Por ajo që nisi si një operacion për të dobësuar opozitën, po prodhon një efekt tjetër: CHP-ja po del nga kriza me një lider më të ashpër, më luftarak dhe më të gatshëm për përballje direkte me Erdoganin.
Dhe kjo mund të jetë pikërisht ajo që presidenti turk nuk kishte llogaritur.
