Një fluturim i kompanisë EasyJet nga Hurghada e Egjiptit drejt Londrës u detyrua të devijonte dhe të ulej në Romë, pasi u zbulua se një “karikues portativ” po karikohej brenda bagazhit të një pasagjeri.
Fluturimi EZY2618, i nisur drejt aeroportit Luton, u ul në mënyrë të sigurt në aeroportin Fiumicino të Romës të martën në mbrëmje, pasi kapiteni vendosi devijimin “si masë paraprake”, në përputhje me rregullat e sigurisë ajrore.
Sipas kompanisë, një pasagjer njoftoi ekuipazhin gjatë fluturimit se pajisja ndodhej në bagazhin e vendosur në pjesën e poshtme të avionit. Rregulloret ndërkombëtare ndalojnë përdorimin apo karikimin e “karikuesve portativë” në bagazhet e regjistruara, për shkak të rrezikut që bateritë lithium-ion të mbinxehen ose të marrin flakë.
Të dhënat e FlightRadar24 tregojnë se avioni po fluturonte në lartësinë 36 mijë këmbë mbi Detin Adriatik, kur rreth tre orë pas nisjes bëri një kthesë të fortë dhe u drejtua për në Romë.
Nuk raportohet të ketë pasur zjarr apo defekt me pajisjen, por autoritetet ajrore e konsiderojnë situatën potencialisht të rrezikshme.
Pasagjerët kaluan natën në Romë dhe fluturimi u riprogramua për ditën tjetër. Kompania tha se u ofroi hotel dhe ushqim udhëtarëve.
Shumë kompani ajrore kanë ashpërsuar rregullat për “karikuesit portativë” pas disa incidenteve me bateri lithium-ion. Në janar 2025, autoritetet koreano-jugore thanë se një pajisje e tillë dyshohej si shkaku i zjarrit që shkatërroi një avion pasagjerësh në Korenë e Jugut.
