Autoritetet franceze po hetojnë një nga skandalet më të rënda të viteve të fundit në sistemin arsimor, pas më shumë se 100 denoncimeve për keqtrajtim, dhunë fizike dhe abuzim seksual ndaj fëmijëve të vegjël në çerdhe, kopshte dhe shkolla fillore në Paris.
Sipas prokurorisë së Parisit, hetimet përfshijnë 84 parashkolla, rreth 20 shkolla fillore dhe afro 10 qendra të kujdesit ditor. Dyshimet bien mbi të ashtuquajturit “monitorues shkollash”, persona të ngarkuar me mbikëqyrjen e fëmijëve gjatë vakteve, orëve të gjumit dhe aktiviteteve pas mësimit.
Kryeprokurorja e Parisit, Laure Beccuau, konfirmoi se disa prej rasteve përfshijnë akuza tepër të rënda për përdhunim të fëmijëve deri në tre vjeç.
Sistemi i monitorimit të shkollave në Francë është vënë në qendër të kritikave, pasi këta punonjës rekrutohen nga autoritetet lokale dhe jo drejtpërdrejt nga ministria e arsimit, shpesh pa trajnim të specializuar apo kontrolle të mjaftueshme.
Prindër dhe avokatë pretendojnë se prej vitesh kishin ngritur shqetësime për dhunë dhe sjellje abuzive, por alarmet e tyre nuk ishin marrë seriozisht. Sipas tyre, dështimet në rekrutim dhe mbikëqyrje kanë lejuar vazhdimin e abuzimeve.
Avokati Louis Cailliez, i cili përfaqëson disa nga familjet, deklaroi se fëmijët po vuajnë pasoja të rënda fizike dhe psikologjike. Ai e quajti sistemin francez të monitorimit të shkollave “një katastrofë kombëtare”.
Në një nga rastet më tronditëse, një vajzë trevjeçare dyshohet se është përdhunuar nga një monitorues shkolle në një shkollë në perëndim të Parisit. Në një rast tjetër, një djalë trevjeçar dyshohet se është abuzuar seksualisht nga i njëjti person, i cili më parë ishte transferuar në një tjetër shkollë pas ankesave për dhunë ndaj fëmijëve.
Javën e ardhshme pritet të nisë në Paris gjyqi ndaj një monitoruesi shkolle të akuzuar për abuzim seksual të pesë fëmijëve mes moshës tre dhe pesë vjeç në një çerdhe të kryeqytetit francez. Një tjetër vendim gjykate pritet muajin e ardhshëm për një 47-vjeçar të akuzuar për abuzim seksual ndaj nëntë vajzave 10-vjeçare.
Bashkia e Parisit ka paralajmëruar masa urgjente dhe investime për reformimin e sistemit të monitorimit të shkollave, ndërsa hetimet vazhdojnë. Skandali ka shkaktuar tronditje të fortë në opinionin publik francez dhe ka rritur presionin për transparencë dhe përgjegjësi institucionale.
