Shtetet e Bashkuara dhe Irani raportohet se janë në diskutime për një plan që parashikon rihapjen e Ngushticës së Hormuzit, 30 ditë pas arritjes së një marrëveshjeje paqeje mes palëve.
Sipas gazetës financiare japoneze Nikkei, që citon një burim diplomatik nga Lindja e Mesme, marrëveshja do të përfshinte hapjen e korridorit strategjik detar në këmbim të lehtësimit të presionit amerikan ndaj porteve iraniane.
Më herët, një zyrtar i lartë amerikan deklaroi se Teherani kishte pranuar “në parim” rihapjen e ngushticës, e cila ka qenë kryesisht e bllokuar për trafikun tregtar gjatë konfliktit, duke ndikuar drejtpërdrejt në rritjen e çmimeve globale të naftës.
Burimet bëjnë me dije se palët synojnë të arrijnë një marrëveshje përfundimtare brenda 60 ditëve, megjithatë ende mbeten pengesa të rëndësishme lidhur me programin bërthamor iranian dhe çështjen e heqjes së sanksioneve.
Pavarësisht këtyre mosmarrëveshjeve, zyrtarët amerikanë shprehen optimistë se diferencat mund të zgjidhen në një kohë relativisht të shkurtër.
Një sinjal pozitiv për ecurinë e negociatave konsiderohet edhe prania e një delegacioni iranian në Katar gjatë së hënës, ku ndodhen edhe figura të rëndësishme të ekipit negociator të Teheranit. Sipas palës amerikane, Katari po luan një rol kyç si ndërmjetës në bisedime.
