Ellen Roome, nëna e Jools Sweeney, 14-vjeçarit britanik që dyshohet se humbi jetën pas një sfide në TikTok, i ka bërë thirrje qeverisë britanike të ndalojë përdorimin e rrjeteve sociale për fëmijët nën moshën 16 vjeç.
Ajo akuzoi qeverinë e Keir Starmer se po e shtyn vendimin dhe po vepron shumë ngadalë përballë rrezikut që paraqesin platformat sociale për fëmijët dhe adoleshentët.
“Le ta ndalojnë derisa të bëhet e sigurt. Nuk më intereson nëse e heqin për të rritur dhe fëmijë. Thjesht ta heqin, ta rregullojnë dhe pastaj ta rikthejnë,” deklaroi ajo për BBC.
Roome është mes familjeve që do të takohen me kryeministrin britanik, ndërsa këtë javë mbyllet konsultimi publik për një ndalim të mundshëm të rrjeteve sociale për nën 16-vjeçarët, sipas modelit të Australisë.
Ish-ministri britanik i Shëndetësisë, Wes Streeting, krahasoi rrjetet sociale me industrinë e duhanit, duke akuzuar kompanitë teknologjike se ndërtojnë platforma që krijojnë varësi tek fëmijët.
Sipas tij, ekziston gjithnjë e më shumë evidencë se përdorimi intensiv i rrjeteve sociale ndikon negativisht te gjumi, përqendrimi, shëndeti mendor dhe mirëqenia e fëmijëve.
Qeveria britanike po shqyrton masa të reja si kufizime moshe për funksione të caktuara të aplikacioneve, ndalimin e “scroll”-it pa fund, kufizime për algoritmet e personalizuara dhe orare të detyrueshme pa ekran për fëmijët dhe adoleshentët.
