Një sondazh i ri në Francë tregon se lideri i ekstremit të djathtë, Jordan Bardella i Tubimit Kombëtar, mbetet favoriti kryesor për zgjedhjet presidenciale të vitit 2027, ndërsa gara po ndërlikohet nga një rritje e fortë e mbështetjes për kandidatin e ekstremit të majtë, Jean-Luc Mélenchon.
Sipas sondazhit të realizuar nga Odoxa dhe të publikuar të martën, Bardella do të fitonte balotazhin përballë kandidatit konservator dhe ish-kryeministrit Édouard Philippe me 52% kundrejt 48%.
Megjithatë, vëmendja kryesore e analizës është zhvendosur tek raundi i parë, ku situata duket gjithnjë e më e paqëndrueshme për kampin qendror. Sipas të dhënave, Mélenchon po rritet ndjeshëm dhe është tashmë shumë pranë Philippe, duke e bërë të pasigurt renditjen për kalimin në balotazh, shkruan Politico.eu.
Kreu i La France Insoumise rezulton me 16% në raundin e parë, nga 12% që kishte në një sondazh të ngjashëm një muaj më parë. Ndërkohë, Édouard Philippe ka rënë në 17%, nga 21% më parë, duke humbur terren në garën e brendshme për kampin centrist dhe të djathtën tradicionale.
Sipas analizës së sondazhit, Mélenchon është gjithashtu kandidati më i preferuar i votuesve të majtë, duke marrë 49% të mbështetjes, përpara ish-presidentit François Hollande me 43% dhe eurodeputetit Raphaël Glucksmann me 36%.
Ekspertët e Odoxa-s paralajmërojnë se rritja e Mélenchon mund të ndryshojë balancat e garës, duke e bërë më të vështirë për kandidatët e qendrës sigurimin e një vendi në balotazh.
Në një sondazh të mëparshëm të publikuar në nëntor, Bardella parashikohej të fitonte bindshëm ndaj Mélenchon në balotazh me 74% kundrejt 26%, duke treguar diferencën e madhe në një përballje të mundshme mes ekstremit të djathtë dhe të majtë.
