Ilir Alimehmeti, një nga mjekët më të respektueshëm në Shqipëri dhe kandidatët më të nderuar të opozitës, ka ngritur mbrëmë shqetësimin për mungesën e specializimit të mjekësisë që merret me moshën e vjetër, geriatrinë, duke e cilësuar këtë si mungesë vizioni në sistemin shëndetësor. Ai thekson se vendi po përballet me plakjen e popullsisë dhe se nevojitet një qasje më e kujdesshme për kujdesin shëndetësor të të moshuarve.
“Fjalën geriatri e keni dëgjuar ndonjëherë? As nuk është dëgjuar në 12 vjet. Është specializimi i mjekësisë që merret me moshën e vjetër, siç është pediatria specializimi që merret me moshën e vogël. As nuk e dinë se çfarë është. Po plaket popullata. A ka nevojë për shërbim shëndetësor për moshë më të vjetër sepse po shkojmë drejt plakjes. Kjo është mungesa e një vizioni. Qeveria duhet të buxhetojë. Kjo nuk është shëndetësi që bëhet,” u shpreh Alimehmeti.
Geriatria është një degë e mjekësisë që fokusohet te parandalimi, diagnostikimi dhe trajtimi i sëmundjeve tek të moshuarit. Ndërsa vendet e zhvilluara kanë struktura të specializuara për këtë grupmoshë, në Shqipëri mungesa e këtij specializimi dhe shërbimeve të dedikuara mbetet një sfidë e madhe.
Është në nderin e çdo force opozitare ta ngrejë këtë problem në media dhe ta pasqyrojë në programet elektorale jo thjesht si koncept, por si mënyrë për t’i ardhur në ndihmë qytetarëve të lënë krejt pa kujdes në këtë fushë. Zëri i Ilir Alimehmetit është i duhuri për opozitën, por i vetëm nuk mjafton për të zgjuar dhe vënë në lëvizje mekanizmat që do të mund të zgjidhin këtë problematikë të shëndetësisë në Shqipëri.
Ndërkohë, plakja e popullsisë në vend është një trend që kërkon vëmendje të shtuar. Investimi në geriatrinë do të ndihmonte në përmirësimin e cilësisë së jetës për të moshuarit dhe do të ulte ngarkesën mbi sistemin shëndetësor.
