Ish-kryeministri italian, Matteo Renzi, ka vizituar sot kampin e emigrantëve në Gjadër të Lezhës. Ai kritikoi ashpër marrëveshjen mes kryeministres italiane, Giorgia Meloni, dhe kryeministrit shqiptar, Edi Rama.
Sipas Renzit, kampi duhet të shndërrohet në një qendër për të burgosurit shqiptarë të dënuar në Itali, duke argumentuar se ky do të ishte një përdorim më i mirë i fondeve publike italiane.
Ai akuzoi qeverinë italiane për shpërdorim të rreth 1 miliardë eurove në ndërtimin e kampeve në Shqipëri, duke theksuar se këto para mund të ishin përdorur për rritjen e pagave dhe pensioneve në Itali.
Renzi e cilësoi projektin një veprim propagandistik të Melonit dhe kritikoi mungesën e një justifikimi real për ndërtimin e qendrave të emigrantëve jashtë territorit italian.
Gjithashtu, ai deklaroi se vendosja e këtyre kampeve në Shqipëri dëmton procesin e anëtarësimit të vendit në Bashkimin Evropian dhe se një marrëveshje për transferimin e të burgosurve shqiptarë nga Italia do të ishte një zgjidhje më e drejtë dhe e dobishme për të dy vendet.
