Termi “Black Friday” nuk lidhej fillimisht me blerjet pas Ditës së Falënderimeve, por me një krizë financiare në SHBA. Në 24 shtator 1869, tregu i arit pësoi një rënie të rëndë për shkak të një skeme të dy financierëve të paskrupullt të Wall Street-it, Jay Gould dhe Jim Fisk. Ata tentuan të blinin sa më shumë ar për të rritur çmimin dhe për të fituar shuma të mëdha. Por të premten, konspiracioni dështoi, duke shkaktuar kaos në bursë dhe falimentime masive.
Në lidhje me blerjet, një nga historitë më të përhapura tregon se termi “Black Friday” u krijua nga shitësit, pasi dyshohej se pas një viti me humbje (“në të kuqe”), dyqanet siguronin fitime (“kalonin në të zezë”) falë blerjeve të mëdha pas Ditës së Falënderimeve. Edhe pse termat “e kuqe” dhe “e zezë” lidheshin me kontabilitetin, kjo histori nuk është plotësisht e saktë.
Një mit tjetër pretendon se në vitet 1800, pronarët e plantacioneve në jug të SHBA-së blinin skllevër me çmime të ulëta të premten pas Ditës së Falënderimeve. Kjo histori ka nxitur thirrje për bojkot të këtij “festimi”, por nuk ka asnjë provë që e mbështet.
Historia e vërtetë e “Black Friday” daton në vitet 1950 në Filadelfia, ku policia përdori këtë term për të përshkruar kaosin që ndodhte pas Ditës së Falënderimeve. Hordhi turistësh dhe blerësish vërshonin në qytet përpara ndeshjes së madhe të futbollit mes ushtrisë dhe marinës amerikane, duke krijuar rrëmujë dhe duke shtuar punën për policinë. Në këtë periudhë, edhe vjedhjet në dyqane ishin në kulmin e tyre.
Në vitin 1961, termi “Black Friday” ishte bërë aq popullor në Filadelfia, saqë tregtarët u përpoqën ta ndryshonin në “E premtja e Madhe” për të hequr ndjesinë negative, por pa sukses. Vetëm në vitet 1980 termi u përhap në të gjithë SHBA-në dhe mori një kuptim pozitiv falë përpjekjeve të shitësve për ta transformuar në një simbol të fitimeve të mëdha. Kështu lindi ideja që dyqanet kalonin “nga e kuqja në të zezë” atë ditë.
Sot, “Black Friday” nuk është më thjesht një ditë, por një ngjarje disa-ditore që përfshin edhe “Small Business Saturday” dhe “Cyber Monday”. Dyqanet hapen gjithnjë e më herët, dhe për blerësit më të vendosur, pazaret mund të nisin menjëherë pas darkës së Falënderimeve.
