Prokuroria e Tiranës ka dyshime se i njëjti grup që realizoi atentatin mafioz ndaj ish-policit Gentian Bejtja pasditen e 15 marsit 2024, ka realizuar dhe sulmin me armë ndaj biznesmenit Ardian Gjeloshi, ku ky i fundit mbeti i plagosur, ndërsa u vra Selman Mihana ekonomisti 70-vjecar i firmës së inerteve.
Bëhet fjalë për atentatin që ndodhi në shkurt të 2024, në biznesin e inerteve të Gjeloshit, në fshatin Gurëz të Kurbinit.
Gjeloshi i tha policisë se nuk ka përplasje me askënd, por hetuesit kanë zbuluar konfliktet e tij me bossë të krimit në zonën e Lezhës.
Dyshimet janë se pjesë e togës së vrasësve të ketë qenë dhe Rohan Brahimi alias Sidorel Prendi, i cili u ekzekutua në Greqi pas vrasjes së Gentjan Bejtjas. Sikurse rezulton nga hetimet Brahimi është kunat i Ilir Beqarajt i arrestuar si i dyshuar për vrasjen dhe mik i Flodian Plakut, vlonjatit që u shpall në kërkim, pasi dyshohet se ka patur rolin e ekzekutorit në ngjarje.
Hetuesit kanë zbuluar se Roan Brahimi një emër kontrovers që dyshohej për krime të rënda, ka paguar dhe bileta udhëtimi apo shpenzime për tjera për Plakun dhe gjurmët e këtyre të dhënave u zbuluan gjatë kontrollit në një agjenci turistike në Lezhë.
Prokuroria e Tiranës është duke vlerësuar që ta dërgojë dosjen penale për hetime të mëtejshme në SPAK, përderisa ka dyshime të forta se ndodhet përpara një grupi të strukturuar kriminal që kryen vrasje më pagesë.
Në rastin e vrasjes së Bejtjas, ekzekutori kryesor Flodian Plaku alias Flodian Mamo alias Flodian Serjani, i njohur si Pole Qorri, është rekturuar nga bandat e Vlorës. Ai dyshohet të jetë një prej autorëve të vrasjes së ish-policit të Burgjeve, Gentjan Bejta, më 15 mars 2024, në oborrin e banesës së tij në fshatin Larushkë të Krujës.
I njëjti person, dyshohet të ketë bashkëpunuar me eksponentë të krimit në Lezhë e Krujë për të kryer atentate të tjera mafioze, sikurse ishte dhe rasti i Ardjan Gjeloshit, ku vranë ekonomistin Selman Mihana.
SPAK ka ndërkohë në duar edhe dosje të tjera, sic është atentati Ylli Brahimi (Brahjas), i cili mbeti i plagosur, ndërsa viktimë mbeti Klisman Preci. Brahja njihej si truri financiar i Ervis Martinaj dhe ishte në përplasje të forta me Rohan Brahimin alias Sidorel Prendin, me të cilin kishin lidhje krushqie, që ngjan se është personazhi që bashkon të 3 ngjarjet.
