Ndërsa në Shqipëri kanë nisur hetimet për eksportin e mbetjeve të dyshuara toksike, pakkush nga media dhe politika flet për fatin e anijeve që u nisën në fillim të gushtit nga Porti i Durrësit. Një artikull i botuar në “Straits Times” një nga më të lexuarat në Singaport hedh dritë për anijet e kompanisë Maersk që u kthyen mbrapsht nga Singapori.
Artikulli i plotë në vijim.
Dy dërgesa që besohet se përmbajnë mbetje toksike të padeklaruara që zbarkuan në brigjet e Singaporit në gusht, janë rrugës për në Shqipëri.
Më 18 gusht, Maersk Campton besohet se ka shkarkuar 41 kontejnerët e tij në Singapor. Të nesërmen, kontejnerët u transferuan në një anije tjetër nën Mediterranean Shipping Company që ishte planifikuar të lundronte për në Itali më 21 gusht.
Anija e dytë, Maersk Candor, e cila mbante 61 kontejnerët e mbetur, u ankorua në Singapor më 24 gusht. Një kërkim në portalin e gjurmimit detar MarineTraffic.com tregoi se Maersk Candor ishte ankoruar në terminalin Pasir Panjang më 25 gusht.
Agjencia Kombëtare e Mjedisit (NEA) dhe Autoriteti Detar dhe Portual i Singaporit (MPA) thanë më 26 gusht se: “Maersk po i dërgon kontejnerët në vendin e eksportit. Maersk Campton ishte ankoruar dhe që atëherë është nisur nga Singapori, dhe Maersk Candor është rrugës”, thanë dy agjencitë.
Të pyetur për përmbajtjen e dërgesave, ose nëse Singapori kishte kryer teste për të përcaktuar nivelet e metaleve të rënda dhe substancave të tjera në to, AKM dhe MPA thanë vetëm se: “Në përputhje me Konventën e Bazelit, Singapori po asiston në kthimin e kontejnerëve .
Në një letër të 14 gushtit drejtuar Portit Laem Chabang në Tajlandë që u publikua në internet, Maersk tha se dy anijet nuk ishin planifikuar të ndalonin në Tajlandë.
“Duke pasur parasysh spekulimet në lidhje me përmbajtjen e këtyre kontejnerëve, kompania aktualisht po bashkëpunon me autoritetet përkatëse në Singapor dhe linjën e anijeve në emër të së cilës ne operojmë, për të siguruar që këto kontejnerë të kthehen në Shqipëri me mjetet më të mira të mundshme”, shkruan Maersk.
