Një grevë e përgjithshme 24-orëshe paralizoi këtë të mërkurë Greqinë, duke shkaktuar ndërprerje masive në të gjithë vendin. Tragete të bllokuara në porte, fluturime të pezulluara dhe ndalimi i qarkullimit të trenave ishin pasojat më të dukshme të kësaj greve, që mblodhi mijëra punëtorë në protesta kundër rritjes së kostos së jetesës dhe për rritje pagash.
Grevës i janë bashkuar dy sindikatat më të mëdha të vendit – ajo e sektorit publik dhe ajo e sektorit privat – të cilat kërkojnë rritje urgjente të pagave si dhe rikthimin e kontratave kolektive të punës. “Blejmë 10% më pak se në vitin 2019,” deklaroi Konfederata e Punëtorëve GSEE, që përfaqëson mbi 2 milionë punonjës. “Po protestojmë për të drejtat më themelore: rritje pagash dhe kontrata kolektive tani.”
Ndikimi i grevës u ndje edhe në Shqipëri. Aeroporti Ndërkombëtar “Nënë Tereza” konfirmoi anulimin e 6 fluturimeve drejt dhe nga Greqia. Autoritetet aeroportuale u bëjnë thirrje udhëtarëve të kontaktojnë kompanitë ajrore për informacion të mëtejshëm.
Pavarësisht premtimeve të qeverisë greke për rritje të mëtejshme të pagës minimale deri në 950 euro në vitin 2027 dhe të pagës mesatare në 1,500 euro, sindikatat theksojnë se këto masa nuk janë të mjaftueshme për të përballuar rritjen e çmimeve të ushqimeve, energjisë dhe qirave.
Sipas Eurostat, paga minimale në Greqi – në terma të fuqisë blerëse – mbetet ndër më të ulëtat në Bashkimin Evropian, duke lënë pas vetëm Portugalinë dhe Lituaninë. Ndërsa paga mesatare bruto është ende 10% më e ulët krahasuar me vitin 2010, periudha kur vendi hyri në krizën e borxhit.
Punonjësit e sektorit publik, të goditur rëndë nga masat shtrënguese të dekadës së fundit, janë gjithashtu në grevë, duke kërkuar rikthimin e shpërblimeve vjetore që iu hoqën vite më parë. Ndërkohë, qeveria konservatore greke thekson nevojën për kujdes buxhetor, për të shmangur një rritje të interesave mbi borxhin publik që mbetet më i larti në eurozonë.
