Ministria e Jashtme e Greqisë ka ndërhyrë zyrtarisht pranë qeverisë shqiptare pas incidenteve të ndodhura mbrëmjen e 30 majit në Zvërnec, ku gjatë një proteste të banorëve për të drejtat e tyre pronësore mbeti i plagosur edhe një shtetas grek.
Në një deklaratë zyrtare, Athina shprehu shqetësim të fortë për ngjarjen dhe bëri të ditur se Ambasada e Greqisë në Tiranë ndërmori menjëherë të gjitha veprimet e nevojshme për t’i ofruar qytetarit grek ndihmë konsullore dhe mjekësore.
“Ministria e Jashtme shpreh shqetësimin e saj të fortë për incidentet që ndodhën më 30 maj 2026 në Zvërnec të Shqipërisë, gjatë një proteste të banorëve për të drejtat e tyre pronësore, mes të cilëve ishte edhe një shtetas grek që mbeti i plagosur”, thuhet në deklaratë.
Sipas Athinës, Ambasada greke në Tiranë ka kërkuar nga autoritetet shqiptare zbardhjen e plotë të ngjarjes dhe përcaktimin e përgjegjësive për incidentet e ndodhura gjatë protestës.
“Ambasada e Greqisë në Tiranë po kryen ndërhyrjet e nevojshme pranë palës shqiptare, duke kërkuar zbardhjen e plotë të incidentit dhe përcaktimin e përgjegjësive. Në këtë kuadër, regjistrojmë reagimin e parë të autoriteteve shqiptare”, theksohet më tej në deklaratë.
Në reagimin e saj, Ministria e Jashtme greke e lidh çështjen edhe me procesin e integrimit europian të Shqipërisë. Athina nënvizon se respektimi i shtetit të së drejtës, mbrojtja e të drejtave pronësore dhe e të drejtave të anëtarëve të Minoritetit Kombëtar Grek, si dhe mbrojtja efektive e zonave të mbrojtura mjedisore, janë pjesë e standardeve europiane që Shqipëria duhet të respektojë.
“Nënvizojmë nevojën për respektimin e plotë të shtetit të së drejtës, përfshirë mbrojtjen e të drejtave dhe pronave të anëtarëve të Minoritetit Kombëtar Grek, si dhe rëndësinë e mbrojtjes efektive të zonave të mbrojtura mjedisore, në kuadër të përafrimit me acquis communautaire të Bashkimit Europian, respektimi i të cilit përbën parakusht për përparimin e procesit të anëtarësimit”, thuhet në deklaratën e Ministrisë së Jashtme greke.
