Një grabitje e armatosur është regjistruar mesditën e kësaj të marte në një filial të OTP Bank në Tiranë. Ngjarja ka ndodhur rreth orës 12:26 në rrugën “Gjin Bue Shpata”, pranë zonës së stadiumit “Dinamo”, ku një person i maskuar ka arritur të marrë një shumë parash nën kërcënimin e armës.
Sipas të dhënave paraprake, autori ka mbërritur pranë bankës me një skuter, duke ardhur nga drejtimi i kryqëzimit të “Komunës së Parisit”. Pasi ka parkuar mjetin jashtë ambienteve të filialit, ai ka hyrë menjëherë në bankë dhe, nën kërcënimin e një sendi që dyshohet të ketë qenë armë zjarri, ka detyruar punonjësit t’i dorëzojnë një shumë parash, vlera e së cilës ende nuk është bërë publike.
Pas kryerjes së grabitjes, personi i maskuar është larguar me shpejtësi me të njëjtin skuter. Sipas informacioneve, ai ka lëvizur fillimisht në drejtim të rrugës “Sulejman Delvina”, me qëllim humbjen e gjurmëve, ndërsa më pas itinerari i arratisjes ka vijuar drejt zonës së ish-Bllokut.
Menjëherë pas njoftimit për ngjarjen, policia ka ngritur pika kontrolli në disa akse kryesore rrugore dhe ka angazhuar strukturat operacionale për identifikimin dhe kapjen e autorit. Gjithashtu, hetuesit po analizojnë pamjet e kamerave të sigurisë në bankë dhe në zonat përreth, me qëllim dokumentimin e lëvizjeve të autorit para dhe pas grabitjes.
