Në Shqipëri klubi më i titulluar në futboll është dënuar që të mos ketë tifoz në stadium deri në fund të vitit. Incidentet që shkaktuan tifozët bardheblu në ndeshjen kundër Vllaznisë të cilën e humbën 4-3, i kanë kushtuar shtrenjtë klubit kryeqytetas.
“KF Tirana, për sjellje të gabuar të spektatorëve, duke hedhur sende në fushën e lojës dhe duke mos garantuar sigurinë e lojtarëve të ekipit mik, në bazë të neneve 6/3/b, 8/1, 17/1, 17/2/b, 17/2/c dhe 17/2/h të KDE, dënohet me gjobë në masën 300.000 (treqind mijë) lekë dhe zhvillimin pjesës së mbetur të ndeshjeve të sezonit futbollistik 2024-2025 pa spektatorë”, thuhet në njoftimin e FSHF-së.
Mirëpo mjafton kaq për të kuptuar se ku është katandisur sporti në këtë vend dhe se çfarë janë në gjendje të bëjnë këta kur duan ta rrëzojnë një klub ditën që do ta nxjerrin nga shtëpia. Kështu ndodhi edhe me Partizanin, kur e zbythën nga kompleksi. Ti marrim gjërat me radhë...
1) Klubi më i titulluar në vend (26 tituj) dënohet që në fillim të nëntorit që të mos ketë tifozë. A është dështim i Federatës që ofron si zgjidhje problemi mbylljen e tribunave.
2) Për disa syresh që hedhin lëndë plasëse në fushë dënohet një tifozeri, një qytet dhe shkatërrohet financiarisht klub. A është dështim i klubit Tirana dhe padyshim i forcave të rendit që nuk identifikojnë dot ata pak që shkaktojnë dëmin?
3) A është rastësi që pikërisht vitin kur do të shembet stadiumi “Selman Stërmasi” dhe aty do ndërtohen disa kulla, Tirana po degdiset në çdo qytet si ekip jetim? Si skuadër pritëse me Vllazninë luajti në Lushnje, me Dinamon luajti në Vlorë, me Laçin luajti në Korçë...
4) A është kjo një goditje e përqendruar nga FSHF-ja dhe institucioneve të tjera? Pra ia heqin Tiranës tifozët nga stadiumi, sepse janë të vetmit që reagojnë dhe bëjnë “zhurmë” për rrënimin e skuadrës së tyre?
5) A po përsëritet historia si me Partizanin? Edhe atëherë të kuqtë mbetën rrugëve dhe zbritën nga kategoria kur vendosën t’ua merrnin kompleksin...
6) A bëhen qesharake një ministri sportesh, një federatë dhe një kampionat kur në kryeqytet ka tre stadiume, të tre të rikonstruktuar ose të bërë nga e para 10 vitet e fundit, por klubi më i madh degdiset sa më larg të jetë e mundur? Apo mos ndoshta ky quhet krim?
7) Po bashkia si aksionare e klubit ç’mendim ka për këtë trajtim që i bëhet klubit të Tiranës?
8) A ka përgjegjësi Refik Halili që e katandis klubin në këtë farë feje? Apo ka vendosur që të tërhiqet në heshtje dhe të pranojë atë që po gatuan bashkia me federatën dhe të përfitojë çfarë të mundet nga kullat me stadium në mes?
9) Po Ministria e sporteve a e ka idenë se çfarë ndodh me kampionatin kombëtar të futbollit në vend?
10) Po servilët e dobishëm të qeverisë dhe të FSHF-së që justifikojnë cilësinë e një kampionati mediokër dhe mburren se po bëjnë stadiume, a kanë një shpjegim se përse Tirana me Vllazninë luajnë në Shkodër në vitin 2024?
