Gjykata e Lartë zbardhi vendimin për ngjarjet e 21 janarit, ku gjatë një demostrate të opozitës së kohës me 21 janar 2011 u vranë katër protestues.
Gjykata supreme urdhëroi se dosja e 21 janarit të hetohet nga prokuroria e Posacme dhe jo prokuroria e Tiranës, që është e juridiksionit të zakonshëm. Kjo me arsyetimin se duhet hetuar i gjithë zinxhiri drejtues e komandues, duke përfshirë kryeministrin e kohës z.Sali Berisha dhe ministrin e Brendshëm po të kohës, Lulzim Basha dhe të zbardhet roli i tyre në ngjarje.
Për shkak të cilësive të veçanta të tyre, gjykata e Lartë thotë se kjo cështje duhet të hetohet nga prokuroria e Posacme dhe e urdhëron këtë të fundit të regjistrojë procedimin penal mbi bazën e një kallëzimi të bërë me datë 16 shkurt 2023, nga Rajmonda Nika, e veja e Aleks Nikës, një prej 4 të vrarëve në bulevardin Dëshmorët e Kombit.
Kolegji penal arsyeton më tej se në 13 vite kjo çështja ka mbetur e pahetuar për shkaqe nga më të ndryshmet dhe se prokuroria e Tiranës asnjëherë dhe në asnjë rrethanë smund ta hetonte këtë cështje, për shkak të mungesës së kompetencës, pasi niveli i lartë drejtues shtetëror ishin persona që nuk mund të hetoheshin nga një prokurori e zakonshme.
Kolegji vijon më tej, se vendimimarrja bazohet edhe në vendimin e gjykatës së Strasburgut Nika kundër Shqipërisë, ku 21 janari është parë si një krim shtetëror, ndërsa është konstatuar përpjekja për të zhdukur provat dhe ndërhyrja e autoriteteve për të devijuar hetimin.
Për vrasjet e dy protestuesit Ziver Veizi e Faik Myrtaj janë dënuar ish- kreu i Gardës së Republikës Ndrea Prendi dhe gardisti Agim Llupo. Ndërsa vrasjet e Aleks Nikës dhe Hekuran Dedës kanë mbetur pa autorë. E veja e Aleks Nikës akuzon ish-kryeministrin Sali Berisha si urdhëruesin e krimit dhe kërkon hetimin e tij.
Kallëzimi i saj në SPAK nuk u regjistrua dhe u kalua për kompetencë të Prokurorisë së Tiranës. Por vendimi i Gjykatës së Lartë që iu është komunikuar tashmë palëve e detyron SPAK të nisë hetimin për vrasjen e 4 protestuesve.
