Gjermania ka akuzuar Rusinë për përfshirje në një tentativë sulmi me dron ndaj Aeroportit të Leipzigut më 4 gusht, duke paralajmëruar një paketë masash dhe sanksionesh të reja ndaj Moskës.
Ministri i Brendshëm gjerman, Alexander Dobrindt, tha në një konferencë për mediat në Berlin se hetimet kanë çuar në përfundimin se komploti ishte planifikuar nga shërbimet ruse të inteligjencës dhe ishte zbatuar nga operativë të nivelit më të ulët.
Sipas Dobrindtit, konfigurimi i dronit, komponentët e përdorur, eksplozivët dhe sistemet e ndezjes përputhen me pajisje të identifikuara më herët në operacione hibride të lidhura me Rusinë në Evropë.
“Një vlerësim i përgjithshëm i tentativës për sulm më 4 gusht në Aeroportin e Leipzigut përputhet me modelin e njohur të operacioneve hibride ruse në Evropë”, deklaroi ministri, duke shtuar se të dhënat e inteligjencës mbështesin përfundimin se individë të përfshirë kanë vepruar në emër të strukturave shtetërore ruse.
Në të njëjtën konferencë, ministri i Jashtëm Johann Wadephul njoftoi se ambasadori rus ishte thirrur në Berlin për t’i komunikuar protestën zyrtare të qeverisë gjermane dhe masat që do të ndërmerren.
Sipas Wadephul, Konsullata e Përgjithshme ruse në Bonn do të mbyllet më 18 shtator, ndërsa marrëveshja për funksionimin e Shtëpisë Ruse në Berlin do të ndërpritet.
Qendra kulturore, e krijuar gjatë periudhës sovjetike, është parë prej kohësh nga zyrtarë perëndimorë si një strukturë që mund të shërbejë edhe për aktivitete të inteligjencës.
Gjermania ka informuar ndërkohë partnerët e saj në Bashkimin Evropian dhe NATO për masat e planifikuara dhe, sipas Wadephul, ka marrë mbështetjen e tyre.
Berlini do të propozojë gjithashtu përfshirjen e individëve të rinj rusë në listën e sanksioneve të BE-së, si përgjigje ndaj aktiviteteve hibride, ndërsa pritet të ashpërsohen kontrollet e hyrjes për shtetasit rusë.
Qeveria gjermane synon gjithashtu të rrisë presionin ndaj të ashtuquajturës “flota hije” ruse, e cila përfshin një rrjet anijesh të përdorura për transportin e naftës dhe për të anashkaluar sanksionet ndërkombëtare.
