Ministri izraelit i Sigurisë Kombëtare, Itamar Ben-Gvir, ka hyrë në kompleksin e xhamisë Al-Aksa në Jerusalemin Lindor të pushtuar, i shoqëruar nga rabinë, kolonë dhe pjesëtarë të sigurisë, nën mbrojtjen e forcave izraelite.
Sipas Al Jazeera, politikani i ekstremit të djathtë kreu lutje dhe rite talmudike në pjesën lindore të oborreve të xhamisë, ndërsa u shpreh për vendosjen e një tempulli hebre në këtë zonë. Kompleksi i Al-Aksasë është vendi i tretë më i shenjtë i Islamit dhe një nga pikat më të ndjeshme të konfliktit izraelito-palestinez.
Sipas marrëveshjes së status quo-së, në fuqi që prej vitit 1967, jo-myslimanët mund ta vizitojnë kompleksin, por nuk lejohen të kryejnë lutje aty. Megjithatë, Ben-Gvir deklaroi gjatë hyrjes se dikur lutja ndalohej dhe ata që “mërmërisnin” arrestoheshin, ndërsa sot, sipas tij, situata kishte ndryshuar.
Ai foli edhe për nevojën e fryrjes së shofarit dhe solli në vëmendje idenë e një tempulli në këtë vend, duke thënë se kjo duhet bërë “pak nga pak”. Deklarata u pa si një tjetër sfidë e hapur ndaj status quo-së historike dhe fetare të kompleksit.
Ben-Gvir, drejtues i partisë së ekstremit të djathtë “Jewish Power”, ka hyrë disa herë më parë në kompleksin e Al-Aksasë që prej marrjes së detyrës në vitin 2022, duke shkaktuar reagime dhe dënime të gjera.
Ai është një prej figurave më të ashpra të qeverisë izraelite dhe një mbështetës i lëvizjes së kolonëve që kërkon ndryshimin e kontrollit mbi kompleksin dhe ndërtimin e një sinagoge hebraike në vendin ku ndodhet një prej faltoreve më të rëndësishme myslimane.
Guvernatorati i Jerusalemit e dënoi hyrjen e tij në Al-Aksa, duke e cilësuar si një përshkallëzim të rrezikshëm dhe shkelje flagrante të statusit historik dhe ligjor të xhamisë. Sipas autoriteteve palestineze, veprimi synon vendosjen e realiteteve të reja në terren dhe ndryshimin e identitetit islamik të vendit të shenjtë.
Që prej vitit 2003, policia izraelite u ka lejuar kolonëve hyrje të përditshme në kompleksin e Al-Aksasë, me përjashtim të të premteve dhe të shtunave. Ndërkohë, autoritetet izraelite shpesh vendosin kufizime ndaj besimtarëve palestinezë që kërkojnë të falen në këtë vend të shenjtë.
