Komanda Qendrore e SHBA-së ka njoftuar se forcat amerikane kanë nisur goditje ndaj objektivave të Korpusit të Gardës Revolucionare Islamike në Iran.
“Sot, në orën 12:00, forcat amerikane filluan goditjet ndaj objektivave të Korpusit të Gardës Revolucionare Islamike në Iran”, deklaroi CENTCOM përmes një postimi në rrjetin social X.
Sipas komandës amerikane, sulmet vijnë pas përpjekjeve të fundit të IRGC-së për të goditur anije tregtare në Ngushticën e Hormuzit, si dhe pjesëtarë të forcave amerikane të dislokuara në rajon.
Edhe Axios raportoi për goditjet e reja përpara njoftimit zyrtar të CENTCOM-it, duke cituar zyrtarë amerikanë.
Tensionet mes Washingtonit dhe Teheranit vijojnë të jenë të larta pas përshkallëzimit të konfliktit dhe sulmeve amerikane ndaj Iranit. Në qershor u arrit një marrëveshje kornizë me ndërmjetësimin e Pakistanit dhe Katarit, por situata mbeti e brishtë.
Në korrik, Shtetet e Bashkuara nisën një fushatë dyjavore bombardimesh dhe më pas rivendosën një bllokadë detare, pas përplasjeve lidhur me lundrimin në Ngushticën e Hormuzit.
Njoftimi i fundit i CENTCOM-it shënon një tjetër përshkallëzim të drejtpërdrejtë ushtarak mes dy vendeve, ndërsa vëmendja ndërkombëtare është përqendruar te zhvillimet në Hormuz dhe rreziku i zgjerimit të konfliktit në rajon.
