Policia ka vrarë një person të armatosur në afërsi të konsullatës izraelite. Data përkon me Masakrën e Mynihut 1972
Pas incidentit të 5 shtatorit 2024 në Mynih policia është vënë në alarm. Në Mynih të Gjermanisë ndodhi një incident i armatosur pranë Konsullatës Izraelite dhe Qendrës Dokumentare për Nazizmin. Një burrë i armatosur me një armë të tipit "repetier" u pikas nga policia dhe hapi zjarr mbi ta. Në shkëmbimin e zjarrit, ai u plagos rëndë dhe vdiq në vendin e ngjarjes. Identiteti dhe motivet e tij janë ende të panjohura. Policia e Mynihut ndërmori masa të rrepta sigurie, duke vendosur një perimetër të kontrolluar dhe duke përdorur forca speciale për të hetuar situatën. Autoritetet janë duke shqyrtuar një automjet që mund të ketë lidhje me të dyshuarin, duke kontrolluar për ndonjë rrezik të mundshëm të lëndëve shpërthyese. Data përkon me përvjetorin e masakrës së Mynihut 1972 Incidenti përkon me një datë të ndjeshme, përvjetorin e sulmit terrorist të Lojërave Olimpike të Mynihut 1972, kur një grup terrorist palestinez vrau dy sportistë izraelitë dhe mori peng nëntë të tjerë, të cilët u vranë më pas gjatë një përpjekjeje për shpëtim. Ministrja e Brendshme e Gjermanisë, Nancy Faeser, e përshkroi këtë ngjarje si shumë serioze. "Është një incident shumë serioz", deklaroi ajo dhe falënderoi policinë e Mynihut për reagimin e shpejtë. Ajo theksoi se "Mbrojtja e institucioneve hebraike dhe izraelite ka përparësinë më të lartë". Konsullja e Përgjithshme e Izraelit për Gjermaninë Jugore, Talya Lador-Fresher, gjithashtu reagoi duke thënë: "Ky incident tregon se sa i rrezikshëm është rritja e antisemitizmit. Është e rëndësishme që publiku të ngrejë zërin kundër kësaj dukurie"./DW
