“Hungaria është model për ne” – kjo fjali e kryeministrit Rama pas takimit me kryeministrin hungarez, Orban, duket se nuk është pritur mirë nga kryetari i grupit parlamentar të PD, Gazment Bardhi. Ky i fundit ka lëshuar sot kritika ndaj kryeministrit hungarez, duke deklaruar se modeli Orban në Hungari nuk mund të jetë kurrë modeli i Shqipërisë në Europë. Sipas Bardhit, modeli i kryeministrit Orban është ai i kontrollit ndaj medias, që ka cenuar lirinë e shprehjes dhe ka sjellë perceptimin për rritjen e korrupsionit. Ndaj Edi Rama nuk mund të ketë Hungarinë si model për Shqipërinë.
Por akuzat e zotit Bardhi ndaj kryeministrit hungarez ndoshta nuk janë të konsultuara me kryetarin e partisë. Në fakt, Viktor Orban ishte i pari dhe i vetmi që përshëndeti rikthimin e zotit Berisha në PD pas “tradhtisë” së Lulzim Bashës. Vetë kryetari demokrat shprehu mirënjohjen dhe mbështetjen për kryeministrin hungarez gjatë vizitës së këtij të fundit në Tiranë vitin e kaluar.
“Është një nga reformatorët më të mëdhenj sot. Ra COVID-i, po i iknin mjekët dhe infermierët. Me një shpejtësi të rrufeshme ndryshoi gjithçka. Nga ana tjetër, është përpjekur të mbajë një linjë më të butë ndaj rusëve. Por, nuk është i vetmi në Europë,” ka deklaruar Sali Berisha në emisionin “Të Paekspozuarit” në prill të vitit 2022.
Në fakt, deklarata e zotit Bardhi duket më e pavend duke marrë parasysh që Orban dhe Berisha ndajnë një armik të përbashkët, George Soros. Armiku publik i PD dhe fondacioni që mban emrin e tij janë shpallur “non grata” nga kryeministri hungarez. Me kaq gjëra të përbashkëta duket se më shume se ndarje, PD e Berishës ka të përbashkëta me partinë dhe qeverinë e Orban. Gjë që mesa duket është anashkaluar nga kryetari i grupit parlamentar të PD, çka tregon se nuk ka patur shumë sinkronizim me linjën e kryetarit. Ose thjesht ka patur demokraci të brendshme.
