Andrea Mano do të jetë deputeti që do të zëvendësojë Ervin Salianjin në Kuvend, teksa ky i fundit ndodhet në burgun e Fierit. Në një deklaratë për mediat, ai njoftoi se ka marrë dokumentin nga KQZ për mandatin e deputetit dhe se e ka pranuar atë.
Mano ka komentuar pozicionin e tij në Grupin e PD-së dhe atë që pritet të ndodhë me opozitën. Ai theksoi se tani po pret marrjen zyrtare të mandatit nga parlamenti shqiptar, duke theksuar se është deputet i PD-së dhe do t’i bashkohet grupit parlamentar të kësaj partie.
“Pas dorëheqjes sime, kam kryer një akt revolte, një thirrje për reflektim,” tha ai, duke sqaruar se largimi i tij ka qenë një protestë ndaj ish-kryetarit të PD-së dhe jo ndaj partisë në tërësi.
“Pas dorëheqjes unë kam bërë një akt revolte, thirrje për reflektim të gjithë PD ndaj ish kryetarit të PD. Dorëheqja ime dhe e një pjese të madhe e anëtareve të kryesisë dhe më pas e 280 demokratëve që kanë ikur ka qenë një protestë ndaj ish kryetarit të PD por jo ndaj Partisë Demokratike. Sigurisht që ne kemi qenë pjesë e proceseve reformuese në PD të cilat fatkeqësisht nuk shkuan ashtu siç ne mendonim, sepse një pjesë e inturazhit të vjetër politik të zotërisë që iku nga kryetar partie, ju ribashkuan më tej PD, por ne vazhdojmë që të jemi, ashtu si unë, edhe njerëzit që kanë ikur, nuk kanë ikur nga PD por nga funksionet drejtuese që kanë patur, kanë qenë anëtarë kryesie, drejtues sanksionesh, dhe grup sanksionesh. por e kanë dhënë kontributin si anëtarë partie” – është shprehur Mano.
