Përfaqësojnë parti relativisht të vogla dhe të paprovuara, por akuzat ndaj njëri-tjetrit janë të forta, dhe agresiviteti është i madh. Bëhet fjalë për Adriatik Lapaj, Endri Shabanin apo Arlind Qorin, të cilët kohët e fundit në debate televizive nuk i kanë kursyer sulmet ndaj njëri-tjetrit, të ngjashme me ato që Rama, Berisha apo Meta shkëmbejnë prej 30 vitesh. Jo më larg se mbrëmë, në një debat televiziv në Vizion Plus, kryetari i lëvizjes Bashkë dhe sekretari i përgjithshëm i partisë së Ilir Metës shkëmbyen akuza të forta lidhur me fondet e partive përkatëse në fushatë.
Tedi Blushi ka akuzuar Qorin se partia e tij ka vjedhur dhe se ai vetë nuk po justifikon rrogën. Arlind Qori i është përgjigjur se LRI është një parti që financohet nga hajduti më i madh në histori, Ilir Meta. Blushi dhe Qori kanë etiketuar njëri-tjetrin dhe me epitete të tjera, duke mos bërë ndonjë ndryshim nga debati i dy ditëve më parë, ai mes Adriatik Lapaj dhe Tedi Blushit, kur sërish fyerjet dhe sharjet personale pa etikë komunikimi kanë shoqëruar diskutimin në studio. Ndoshta përfaqësuesi i Partisë së Lirisë, Blushi, ka zgjedhur strategjinë për të destabilizuar bisedën dhe bashkëbiseduesin me këto forma. Por, si mundet që këta të rinj të politikës të bien në kurthin e retorikës së vjetëruar që është bërë e lodhshme për shqiptarët? E njëjta gjë mund të thuhet edhe për Endri Shabanin e nismës Thurrje, i cili pak ditë më parë në një debat televiziv iu drejtua Gazment Bardhit me epitetet fyese “idiot dhe shpifës”.
Kjo rrugë e të bërit politikë vetëm pak muaj para zgjedhjeve nuk duket shumë premtuese për ata që pretendojnë të sjellin rrotacionin dhe një politikë ndryshe. Nëse diskursi politik dhe komunikimi publik janë të njëjtë me partitë tradicionale, liderët dhe pinjollët e tyre, atëherë çfarë të reje gjen publiku tek këto figura? Çfarë shprese ngjallin këta të rinj që kanë adoptuar gjuhën e politikës së vjetër? Nuk ka mbetur shumë kohë deri në zgjedhjet e vitit të ardhshëm, ku alternativat e reja mund dhe duhet të ndahen nga politika e vjetër, metodat dhe mënyrat e saj. Përndryshe, vështirë që të bindin qytetarët me ofertën e tyre politike.
