Ish-kryetari i komanduar i PD, Enkelejd Alibeaj ka prezantuar partinë e re politike “Djathtas”. Alibeaj tha se në krye të subjektit të ri politik qëndrojnë 4 figura të larguara nga Partia Demokratike. Partia e re “Djathtas” u krijua nga Enkelejd Alibeaj, Arbi Agalliu, Flutura Acka dhe Seladin Jakupllari.
Pjesë e saj gjithashtu janë edhe Agron Kapllanaj dhe Roland Bejko, Edvin Kulluri dhe Rezart Kthupi.
“Projekt i ri politik. Shteti i së drejtës është themeli ynë. Besojmë se një qeveri është më efikase dhe pakorruptuar kur është kufizuar në madhësi dhe fuqi të saj”, tha Alibeaj.
Ndërsa deputeti Arbi Agalliu, është shprehur se grupet parlamentare janë kthyer në vegla të kryetarit të partisë.
“Marrëveshja e 20028 eliminoi meritokracinë në partitë politike, hoqi mundësinë që qytetarët të zgjedhin deputetin e tyre, dhe ktheu grupet parlamentare në vegla të kryetarit të partisë, nëse nuk bindesh ndaj tyre humbet mundësinë për të qenë në listën e sigurt. Kjo vazhdon edhe në një marrëveshje të disa muajve më parë ku u certifikuan listat e mbyllura.” – u shpreh Agalliu.
