Fredi Beleri, tashmë si eurodeputet, pritet të denoncojë krijimin e shtetit Bektashi në Shqipëri. Mediat greke shkruajnë se Beleri i ka drejtuar Komisionit Evropian, në cilësinë e eurodeputet i Partisë Popullore Evropiane dhe i Demokracisë së Re, anëtar i Delegacionit të Parlamentit Evropian për Komisionin Parlamentar të Stabilizim-Asociimit BE-Shqipëri, planet e Shqipërisë për të krijuar një shtet të pavarur, fetar mysliman në Tiranë, të cilat u shpallën të dielën (22.09) nga foltorja e Asamblesë së Përgjithshme të OKB-së nga Kryeministri i vendit, Edi Rama.
Z. Beleri thekson në pyetjen e tij se "shteti autonom dhe i pavarur do të quhet 'Shteti Sovran i Urdhrit të Bektashinjve'", duke shtuar se "do të ketë dokumentet e tij diplomatike, kufijtë, por edhe një strukturë administrative të veçantë".
Pas kësaj, eurodeputeti i PPE-së dhe i Demokracisë së Re pyet Komisionin nëse krijimi i këtij shteti shkel marrëveshjet për procesin e anëtarësimit të Shqipërisë dhe për veprimet diplomatike që do të ndërmarrë Komisioni për të siguruar bashkëjetesën paqësore të të gjitha komuniteteve fetare në vendin fqinj.
Në vijim është teksti i plotë i pyetjes:
Planet e Shqipërisë për të krijuar një shtet të pavarur, fetar mysliman në Tiranë u shpallën të dielën, më 22.09.2024, nga foltorja e Asamblesë së Përgjithshme të OKB-së nga Kryeministri i Shqipërisë, Edi Rama. Sipas informacioneve të deritanishme, shteti autonom dhe i pavarur do të quhet "Shteti Sovran i Urdhrit të Bektashinjve", ndërsa do të ketë dokumentet e tij diplomatike, kufijtë dhe një strukturë administrative të veçantë. Në shtetin e ri (brenda shtetit shqiptar) do të kenë nënshtetësi vetëm myslimanët shiitë, anëtarë të komunitetit fetar sufi.
Pyetjet e Belerit drejtuar KE: -Cili është qëndrimi i Komisionit për këtë shtet potencialit dhe a i shkel krijimi i tij kushtet e dakorduara për procesin e anëtarësimit të Shqipërisë? Nëse po, çfarë kriteresh shtesë mund të vendosen? -A është krijimi i një shteti të tillë pa zgjedhje në përputhje me kriteret politike të Kopenhagës që duhet të përmbushë çdo vend për funksionimin e institucioneve që garantojnë demokracinë, shtetin ligjor, të drejtat e njeriut, respektimin dhe mbrojtjen e pakicave? -Çfarë lëvizjesh diplomatike synon të bëjë Komisioni për të siguruar bashkëjetesën paqësore të të gjitha komuniteteve fetare në Shqipëri?
