Një dizajn i ri i kartëmonedhës euro ka rindezur një debat të kahershëm mes Francës dhe Polonisë mbi trashëgiminë e shkencëtares fituese të Çmimit Nobel, Marie Curie (e lindur Skłodowska).
E lindur në Varshavë në vitin 1867, Skłodowska-Curie më pas u shpërngul në Francë, ku u bë gruaja e parë që fitoi një Çmim Nobel, kur në vitin 1903 u nderua me këtë çmim prestigjioz për fizikë, së bashku me bashkëshortin e saj, Pierre.
Shkencëtarja e mirënjohur mori gjithashtu Çmimin Nobel për kimi tetë vite më vonë, duke e bërë atë personin e vetëm që ka fituar çmime Nobel në dy fusha të ndryshme shkencore.
Ajo vetë përdori versione të ndryshme të mbiemrit të saj gjatë viteve — gjatë jetës së bashkëshortit të saj, ajo nënshkruante si Skłodowska-Curie, por më vonë gjithnjë e më shpesh si M. Curie.
Historia e saj personale është rikthyer në qendër të vëmendjes pas planeve të Bankës Qendrore Evropiane (BQE) për të prezantuar një seri të re kartëmonedhash, ku Skłodowska-Curie mund të paraqitet në kartëmonedhën 20-euroshe.
Emri i kontestuar
Në Poloni, ky vendim ka shkaktuar një valë pakënaqësie.
Për shumë qytetarë polakë, mospërfshirja e mbiemrit të vajzërisë së fitueses së Nobelit — ose zëvendësimi i emrit polak me versionin e tij francez — nuk është thjesht një çështje formale, por simbolike.
Ata e shohin këtë si një kujtesë për nënvlerësimin e kontributit të Polonisë në historinë evropiane.
Dimensioni politik i debatit u bë i qartë kur mediat dhe komentatorët polakë vunë në dukje se figura të tjera historike — përfshirë Miguel de Cervantes-in apo Ludwig van Beethoven-in — kanë ruajtur emrat origjinalë në secilën version gjuhësor.
Në përgjigje të ankesave, BQE ka theksuar se po merr parasysh kompleksitetin e çështjes.
