Nga të gjitha ngjarjet që po ndodhin, sidomos pas shpalljes non grata, dhe që do të ndodhin në vijim, gjithmonë e më shumë do të përvijohet qartazi që Shteti Shqiptar është shndërruar në një shoqëri aksionare.
Shumica e aksioneve janë pronësi të PS, pakica e aksioneve në pronësi të PD. CEO është Edi Rama dhe biznesi është futja e duarve në buxhet, pra taksat e popullit dhe të bizneseve.
Si në çdo shoqëri aksionare me kulturë korporative të kalbur, aksionari kryesor (pra PS), që ka dhe CEO-n e vetin, drejton me dorë të hekurt kompaninë pa pyetur për interesa apo të drejtat e tjera, përfshi punonjësit (lexo popullin shqiptar).
Në një konfigurim të tillë CEO ka nën thundër edhe aksionarët e pakicës. Këta të fundit detyrohen t’i lepihen e të mos ia prishin qejfin apo t’i kërkojnë llogari CEO-s, sepse fuqia e tij shumë lehtë mund t’ua zhvlerësojë aksionet ose t’i lërë pa to.
Dhe kuptohet, kur nuk je aksionar nuk ke pjesë as në dividend (dmth në ndarjen e plaçkës së buxhetit).
Ky është konfigurimi politik sot në Shqipëri, një sipërmarrje korporative dhe aspak aksione mirëfilli politike. Prandaj opozita është sot vetëm nëpunëse e Ramës-CEO dhe aspak krah politik kundërshtar.
