Mazhoranca e Partisë Socialiste po akuzohet se po kthen në një proces fiktiv e me përqeshje dëgjesat dhe konsultimet publike sa i përket reformës administrative-territoriale. Projektligji për hartën e re territoriale pritet të kalojë pa konsensus dhe të miratohet në seancën plenare të së enjtes, më datë 8.
Pavarësisht rëndësisë kritike që ka ky ligj për funksionimin e pushtetit vendor dhe të drejtat e qytetarëve, shkresa zyrtare e Kuvendit (Nr. 4505 prot., e datës 1 tetor 2026) e siguruar nga VNA, u ka mbërritur institucioneve kryesore të pavarura në vend vetëm ditën e premte, më 2 tetor.
Përcjellja e projektligjit "Për ndarjen administrativo-territoriale të njësive të qeverisjes vendore në Republikën e Shqipërisë" u është adresuar institucioneve të tilla si Avokati i Popullit, Kontrolli i Lartë i Shtetit, Komisioneri për Mbrojtjen nga Diskriminimi, Komisioni Qendror i Zgjedhjeve, Komisioneri për Mbikëqyrjen e Shërbimit Civil dhe Komiteti për Pakicat Kombëtare.
Kjo do të thotë se këto institucione kushtetuese e të pavarura kanë në dispozicion vetëm 3 ditë kohë pune — nga e hëna deri të mërkurën — për të analizuar me detaje projektligjin, për të hartuar dhe për të dorëzuar mendimet e tyre teknike e ligjore përpara se votimi të kryhet të enjten.
Afatet e ngjeshura dhe mungesa e një hapësire reale për debat substantive konfirmojnë falsitetin e procesit të konsultimit. Kjo qasje e mazhorancës dëshmon se dëgjesat janë thjesht një procedurë formale "sa për të kaluar radhën", duke anashkaluar mendimin e ekspertëve dhe duke e miratuar reformën pa konsensusin e nevojshëm.
