Ish-deputeti demokrat Ervin Salianji ka reaguar pas vendimit të Gjykatës së Lartë që la në fuqi dënimin e tij me 1 vit burg për akuzën e kallëzimit të rremë në çështjen “Babale”. Në një deklaratë të publikuar pas vendimit, ai e cilësoi këtë një vendim të diktuar politikisht nga kryeministri Edi Rama dhe një sulm të hapur ndaj opozitës.
Salianji u shpreh se ky dënim ka si qëllim ta largojë atë nga beteja politike dhe të frikësojë këdo që denoncon korrupsionin dhe lidhjet e pushtetit me krimin. Ai akuzoi drejtësinë për mungesë pavarësie dhe deklaroi se do të ndjekë të gjitha rrugët ligjore për të kërkuar drejtësi, duke paralajmëruar një apelim në Gjykatën Kushtetuese dhe më pas në Strasburg.
“Imazhi i kësaj gjykate do të hyjë në turpin historik të përdorimit të drejtësisë për hakmarrje politike. Dënimi im politik është mbështetje e hapur për mafien dhe trafikantët ndërkombëtarë,” deklaroi ai.
Salianji, i cili do ta vuajë dënimin në burgun e Fierit, theksoi se nuk do të tërhiqet nga beteja politike, pavarësisht përpjekjeve për ta eliminuar nga gara elektorale e 11 majit. “Unë zgjedh betejën dhe jo qurravitjet! Drejtësia e vërtetë do të vijë kur qytetarët të kenë fjalën e fundit,” përfundoi ai.
