Ish-deputeti Ervin Salianji, i cili po vuan dënimin me 1 vit burgim për dosjen "Babale", i është drejtuar Gjykatës së Lartë me një kërkesë për pezullimin e vendimit. Salianji thekson para Gjykatës së Lartë se ekzekutimi i menjëhershëm i vendimit po cënon rëndë të drejtat e tij dhe se denoncimin ndaj Geron Xhafajt, vëllait të ish-ministrit të Brendshëm Fatmir Xhafaj, e ka kryer në përmbushje të funksionit të tij politik dhe të lirisë së shprehjes.
"Duke pasur parasysh që si në kohën e kryerjes së denoncimit, ashtu edhe aktualisht, ai ka qenë deputet i Partisë Demokratike, deklaratat e tij duhet të vlerësohen në kuadër të përmbushjes së funksionit të tij politik dhe lirisë së shprehjes, të mbrojtura nga neni 10 i Konventës Europiane për të Drejtat e Njeriut (KEDNJ) dhe Kushtetuta e Republikës së Shqipërisë. Gjykata Europiane për të Drejtat e Njeriut, në vendimet e saj, ka argumentuar se procedimi penal përbën një ndërhyrje në lirinë e këtyre subjekteve për t'u shprehur, duke theksuar se, për një politikan, liria e shprehjes është veçanërisht e rëndësishme dhe kërkon argumente tepër të forta për të justifikuar ndërhyrjen në këtë të drejtë," thuhet në kërkesën e paraqitur.
Më tej, avokati i Salianjit, Ledio Braho, thekson se "Referuar jurisprudencës së konsoliduar të Gjykatës së Lartë, në raste të ngjashme, është marrë parasysh momenti i bërjes së këtyre deklarimeve, konteksti politik i tyre, dhe veçanërisht, përballja politike në vend."
Sipas avokatit, vendimi për të dënuar Salianjin ka pasoja të rënda dhe është i pajustifikuar. "Është e qartë se ky vendim ka pasoja shumë të rënda për të dënuarin, pasi ekzekutimi i menjëhershëm i tij do të sjellë përfundimin e mandatit të deputetit dhe do të pengojë kandidimin në zgjedhjet parlamentare të vitit 2025, ku zoti Salianji është caktuar si drejtues politik i Partisë Demokratike për qarkun e Elbasanit. Një element tjetër i rëndësishëm që duhet marrë parasysh nga Gjykata e Lartë është fakti se vepra penale e supozuar ka ndodhur në maj të vitit 2018, pra më shumë se 6 vite para vendimit përfundimtar. Kërkuesi ka marrë pjesë në të gjitha seancat gjyqësore dhe nuk ka shmangur ekzekutimin e vendimit, pavarësisht kohës së gjatë që ka kaluar dhe humbjes së aktualitetit të këtij dënimi në lidhje me funksionin e tij parandalues," theksohet në kërkesë.
Duke u bazuar në këto dhe argumente të tjera, avokatët kërkojnë nga Gjykata e Lartë pezullimin e vendimit.
