Ergys Agasi del para GJKKO-së, avokati kërkon kohë për dosjen/ Shtyhet seanca për në orën 12:00

Në Gjykatën e Posaçme nisi seanca për komunikimin e masës së sigurisë për Ergys Agasin, i akuzuar si kreu i një grupi kriminal që vepronte brenda Agjencisë Kombëtare të Shoqërisë së Informacionit. Agasi u shoqërua nën masa të rrepta sigurie nga ambientet e bllokut të sigurisë në rrugën “Mine Peza” drejt GJKKO-së. Në nisje të seancës, avokati kërkoi kohë të njihet me aktet e dosjes dhe, për rrjedhojë, procesi u ndërpre për të rifilluar në orën 12:00.

Ergys Agasi u arrestua dy ditë më parë në zonën e Plepave në Durrës, në shoqërinë e Ulian Shpatarakut, ish-zyrtar policie, i besuar i ish-kryepolicit Ilir Proda.

Agasi, i konsideruar si koordinatori mes krimit të organizuar dhe Edi Ramës, akuzohet për konkurrencë të paligjshme përmes dhunës, heqje të paligjshme të lirisë, grup kriminal, pastrim parash, etj. Sipas SPAK, bashkë me biznesmenin Ermal Beqiri kishin krijuar një grup kriminal brenda AKSHI, institucion që e drejtonte Mirlinda Karçanaj, e cila po hetohet po ashtu si pjesë e grupit. Prokurorët thonë se nën kërcënim e dhunë apo pengmarrje detyronin biznesmenët të hiqnin dorë nga tenderat e institucionit dhe milionat kalonin në llogaritë e kompanive të Beqirit apo të kontrolluara prej tij. Beqiri është arrestuar në Francë teksa pilotonte një avion mbi një central bërthamor në Penly.