Një ngjarje e rëndë ka tronditur komunitetin shqiptar në Itali, ku katër anëtarë të një familjeje humbën jetën si pasojë e helmimit nga monoksidi i karbonit. Tragjedia ka ndodhur në qytetin e Luccas, ndërsa një person i pestë ka mbetur i shtruar në spital.
Sipas raportimeve të mediave italiane, viktimat janë babai 48 vjeç, nëna 43 vjeçe dhe dy fëmijët e tyre, përkatësisht 22 dhe 15 vjeç. Familja u gjet pa shenja jete brenda banesës, ndërsa autoritetet dyshojnë se shkak i ngjarjes është bërë një defekt në kaldajën e shtëpisë, që ka shkaktuar rrjedhje monoksidi karboni. Hetimet janë ende në vijim për të përcaktuar rrethanat e sakta të tragjedisë.
Ngjarja dyshohet të ketë ndodhur në mbrëmje, rreth orarit të darkës. Ekipet e shpëtimit kanë gjetur tryezën e shtruar, çka tregon se familja ishte përgatitur për të ngrënë. Alarmimin e autoriteteve e ka bërë vëllai i kryefamiljarit, pasi pas trokitjeve të shumta nuk ka marrë përgjigje dhe është detyruar të thyejë derën e banesës.
Në momentin e ndërhyrjes, edhe efektivë të karabinierisë që hynë në banesë për të dhënë ndihmën e parë kanë pësuar intoksikim të lehtë, por ndodhen jashtë rrezikut për jetën. Ndërkohë, familjari i pestë ka humbur ndjenjat nga monoksidi i karbonit dhe është transportuar me urgjencë në spital.
Autoritetet italiane po vijojnë hetimet për të zbardhur plotësisht shkaqet e kësaj tragjedie.
