Gjykata e Posaçme ka shtyrë për më 15 tetor seancën e radhës në procesin gjyqësor ndaj ish-presidentit Ilir Meta dhe Monika Kryemadhit. Në përfundim të seancës, gjykata vendosi të gjobisë avokatët me nga 5 mijë lekë, ndërsa pezulloi edhe afatet e masës së sigurimit ndaj Metës.
Ish-presidenti kundërshtoi vendimin për pezullimin e afateve të paraburgimit, duke argumentuar se ka qenë i pranishëm në proces që prej ditës së parë dhe se mungesa e avokatëve nuk duhet të përdoret si arsye për të mos i llogaritur ditët e qëndrimit të tij në paraburgim.
Meta deklaroi se nuk është ai shkaku i përplasjes së krijuar mes avokatëve dhe gjykatës, ndërsa theksoi se nuk mund t’u kërkojë mbrojtësve të tij të veprojnë në kundërshtim me vendimet e Dhomës Kombëtare të Avokatisë, duke rrezikuar licencën. Avokatët kanë bojkotuar seancat në kundërshtim të rregullores së re të GJKKO-së.
Sipas Metës, ai është i gatshëm që procesi gjyqësor të vijojë, ndërsa e cilësoi situatën e krijuar mes gjykatës dhe avokatëve si një konflikt të stisur. Pas largimit të trupit gjykues nga salla, ish-presidenti pretendoi se konflikti ishte “i stisur nga shokët e Ergys Agasit”.
Në mungesë të kushteve për vijimin e procesit, GJKKO caktoi 15 tetorin si datën e seancës së ardhshme.
