Partia Demokratike ka përshpejtuar ritmin e negociatave me aleatët e saj politikë në përpjekje për të gjetur një kandidaturë të përbashkët që do të sfidojë Ogerta Manastirliun e Partisë Socialiste në zgjedhjet për Bashkinë e Tiranës.
Grupi negociator i opozitës ka zhvilluar një sërë takimesh me përfaqësues të forcave të ndryshme politike jashtë Partisë Demokratike. Një ditë më parë, demokratët janë ulur në tryezë veçmas me Endri Shabanin e “Nisma Thurje” dhe me Adriatik Lapajn nga lëvizja “Shqipëria Bëhet”.
Qëllimi i këtyre bisedimeve, sipas negociatorëve, është testimi i terrenit për një figurë të pranueshme që mund të garantojë unitet të plotë opozitar dhe të sfidojë realisht kandidaturën socialiste në kryeqytet.
Ndërkohë, mësohet se të ngarkuarit e Sali Berishës kanë parashikuar një takim edhe me ish-deputetin Agron Shehaj dhe përfaqësuesit e Partisë “Mundësia”. Në orët në vijim, PD pritet të zhvillojë bisedime edhe me Shpëtim Idrizin e PDIU-së, e cila në Tiranë përfaqësohet me një deputet.
Sipas burimeve, i vetmi që ka vendosur kushte të qarta për të vijuar negociatat deri më tani është Agron Shehaj. Ai ka deklaruar se fitorja në Tiranë është e mundur vetëm nëse opozita mbështet një kandidat që nuk vjen nga partitë politike tradicionale.
