Gjykata Kushtetuese del kundër Qeverisë lidhur me zgjedhjet për Bashkinë e Tiranës.
Sipas Kushtetueses procesi i zgjedhjeve duhet të pezullohet derisa të shprehet lidhur me kërkesën e bërë nga Erion Veliaj kundër shkarkimit nga detyra nga Këshilli Bashkiak.
“Gjykata ka bërë publikimin e regjistrimit të kërkesës. Shpallja është e barazvlefshme me njoftimin publik”, tha përmes një njoftimi në WhatsApp Gjykata Kushtetuese. Ndonëse një njoftim joserioz për peshën e çështjes, Kushtetuesja tha qartë që duhet pritur vendimi i saj për rastin.
Neni 115 i Kushtetutës parashikon që kur një i zgjedhur vendor vë në lëvizje gjykatën Kushtetuese procesi pezullohet automatikisht. Efekti i pezullimit është absolut, që do të thotë se i shtrin efektet edhe ndaj aktit të dërgimit të njoftimit nga Kryeministri në Presidencë, pra edhe ky veprim është në tejkalim të parashikimit kushtetues për pezullim.
Pavarësisht kësaj, Qeveria informoi Presidentin e Republikës për vakancat e krijuara në 6 Bashki të vendit, përfshirë dhe Bashkinë e Tiranës duke kërkuar dekretimin e datës së zgjedhjeve.
